افلام و مسلسلات القوائم

أهم 5 افلام ل DC


تأسست شركة DC سنة 1934 فى امريكا، وهى من أهم الشركات فى العالم من وقتها فى مجال صناعة القصص المصورة والافلام، وهى تعتبر من الشركات التابعة ل WB ومن وقت تأسيسها وهى تعتبر من أشهر الشركات فى العالم فى المجال، ونقدر نقول إن السبب الرئيسى فى الشهرة دى هو أنها بتضم أشهر الأبطال الخارقين زى باتمان وسوبرمان وفلاش .. وكمان بتضم أشهر شخصيات شريرة اهمهم الجوكر وليكس لوثر و CAT WOMAN … وغيرهم.و هنتكلم فى المقال ده عن مجموعة افلام تعتبر هى الأشهر فى تاريخ الشركة.

1- Batman 1989 :

فيلم من إخراج Tim Burton سنة 1989 بطولة مايكل كيتون وجاك نيكلسون، وهو يعتبر أول فيلم عن باتمان.بيحكى عن بدايات ظهور شخصية باتمان فى مدينة جوثام و مواجهته للمجرمين لحد ظهور شخصية مجرم جديد وهو “الجوكر” اللى بدأ ينشر الرعب فى المدينة عن طريق غاز سام بيقتل ضحيته وهو على وجهه ابتسامة مرعبة.الجوكر بيخطف الصحفية فيكى فيل لكن باتمان يقدر ينقذها و يعرفها معلومات عن الغاز اللى بيستخدمه الجوكر، فبيقسم الجوكر انه يقتل باتمان.فيلم كان بداية لسلسلة استمرت حوالى 8 سنين أتقدم فيهم 4 افلام، لكن ده يعتبر افضلهم من جميع النواحى.الفيلم حقق نجاح كبير على المستوى الفنى والنقدى وحقق إيرادات وصلت ل 400 مليون دولار اللى كان رقم كبير جدا وقتها.

2- Superman 1978 :

تم إنتاج الفيلم سنة 1978 من إخراج ريتشارد دونر، بطولة كريستوفر ريف.بيتكلم فى بدايته عن جور.ال العالم فى كوكب كريبتون اللى بيفشل انه يقنع المجلس هناك إن الكوكب على وشك انه يتدمر، فبيقرر هو وزوجته انهم يبعدوا ابنهم المولود حديثاً كال.ال عن الكوكب عن طريق سفينة فضاء توديه لكوكب على حد علمهم لسه بدائي وهو كوكب الأرض، وفعلا ارسلوه للأرض واتدمر كريبتون، واتربى كال.ال اللى بقى اسمه (كلارك) مع جوناثان كينت وزوجته مارثا.ولما يكبر كلارك بيشتغل صحفى فى Daily Planet وبيحب لويس لين زميلته فى الشغل، ويكتشف أصله عن طريق السفينة اللى موجوده فى جراج جوناثان وبيبقى (سوبرمان).و الوحيد اللى يقدر يكتشف حقيقته هو ليكس لوثر، اللى بيواجهه سوبرمان وبيقدر يتغلب عليه فى النهاية.والفيلم برده كان بداية لأربعة افلام لكن برده ده كان أهمها.ميزانية الفيلم كانت 50 مليون$ لكنه قدر يحقق 300 مليون $ محققاً نجاح كبير جداً.

3- The Dark Knight 2008 :

فيلم تم إصداره عام 2008 بطولة كريستيان بيل و الراحل هيث ليدجر، إخراج كريستوفر نولان، والموسيقى للمبدع هانز زيمر.وهو الجزء الثانى من الثلاثية اللى بدأت فى 2006، و مجموعة كبيرة من النقاد والجمهور بيعتبروا إن الفيلم هو أهم فيلم لبطل خارق فى تاريخ السينما.بيتكلم عن ظهور مجرم جديد فى جوثام بيقول على نفسه “الجوكر”، اللى بيحارب تحالف باتمان مع المحقق جوردون والمدعى العام هارفى دينت بهدف إثبات إن العالم بيعيش فى فوضى مطلقة وهى دى الطريقة الوحيدة للحياة.الفيلم أتصور فى شيكاجو، وحقق إيرادات تعدت المليار دولار، تم ترشيحه ل 8 جوائز أوسكار، فاز فقط هيث ليدجر بجائزة أفضل ممثل مساعد عن دور الجوكر لكن بعد وفاته.استكملت السلسلة بعده ب 4 سنين بفيلم the dark knight rises.

4- Suicide Squad 2016 :

من أكثر الافلام إثارة للضجة فى الفترة الأخيرة، تم إصداره فى أغسطس 2016 بطولة ويل سميث ومارجو روبى وجاريد ليتو.
بيتكلم الفيلم عن منظمة سرية تحت قيادة اماندا وولر اللى قررت تهريب مجموعة مجرمين زى هارلى كوين و ديد شوت لمواجهة خطر كبير.بالرغم من أن الفيلم تلقى انتقادات كبيرة من النقاد إلا أنه نجح جماهيريا بتحقيقه 750 مليون $ … و قدر انه يحقق جائزة الأوسكار السنة دى كأفضل تصميم مكياج.والفيلم كان عاشر أكبر فيلم تحقيقا الإيرادات عام 2016.

5- Justice League 2017 :

 

فيلم مقرر نزوله فى 2017 من إخراج زاك سنايدر، بطولة بين افليك وهنرى كافل، والفيلم بيرجعنا لعالم الكوميكس والمسلسلات القديمة بتحدى أبطال العالم زى باتمان و سوبرمان و wonder woman الأخطار اللى بتواجه العالم.وهو طبعا من أهم الافلام المنتظرة فى 2017 على جميع الأصعدة.


About the author

Seif Aldin