تكنولوجي

تدفق الهوا داخل الPC Case


أى PC فى الدنيا بيسخن و طبعاً زى ما فى طرق كتيرة للتبريد و configurations مختلفه للمراوح، فى طريقة مثاليه و هى الى بتبقى أحسن لمعظم الPCs.

هتكلم النهارده علي التدفق بتاع الهوا و ازاى بيفرق مع التبريد.

المراوح بتتحط على حسب الاتجاه الى بتزق بيه الهوا او بتشده على حسب انت حاتطها من انهى نحية، فى حالة انها بتسحب الهوا جوا بيبقى اسمها Intake Fan و لو بتطرد الهوا لبره بيبقى اسمها Exhaust Fan.

لو عاوز تعرف اكتر عن المراوح بتاعت الPC ممكن تخش تقرأ هنا : https://goo.gl/uPRN6r

التدفق فى الcase المفروض يتحرك من قدام تحت لورا فوق زى الصورة

airflow

فى بقى 3 أنواع من التدفق جوا الcase : 

1-ضغط فوق الضغط الجوي (Positive Air Pressure)

ده بيبقى فى حالة ان الهوا الى بيتزق جوا من المراوح اكتر من الهوا الى بيتطرد بره من المراوح. فا الهوا بيدور على اى مكان او خرم يطلع منه فا بيعمل Positive Pressure جوا الcase و ده بيمنع التراب انه يخش الcase فى حالة انك حاطط filter على مراوح الintake. فى الحالة دى درجة حرارة الPC بتبقى مرتفعه سنه بسيطه عن العادى بسبب قلة الexhaust fans.

airflow-postive

2-ضغط تحت الضغط الجوي (Negative Air Pressure)

ده فى حالة ان الهوا الى بيتطرد بره من المراوح اكتر من الهوا الى بيتزق جوا من المراوح. فا بيحصل Vacuum جوا الcase و ده بيؤدى أن ال case تسحب هوا من بره علشان تعوض اللى بيتاخد منها و ده بيعمل Negative Pressure. فى الحاله دى التراب بيبقى اكتر بكتير بسبب دخول هوا من كل حتة بس الPC بيبقى ابرد بسبب دخول هوا بارد كتير و طرد الهوا السخن.

airflow-negative

 

3-ضغط يعادل الضغط الجوي (Neutral Air Pressure) 

ده فى حالة ان الهوا الى بيتطرد بره من المراوح يساوى  الهوا الى بيتزق جوا من المراوح. فا مفيش هوا بيخش ولا بيطلع غير عند المراوح. و ده بيبقى بسبب ان فى تيار متساوى. ده اصعب نوع من التدفق تقدر تحققه لأن مهماً ما كان صعب قوى انك تدخل هوا اد ما هتخرج.

 

airflow-neutral

طيب هنفرض انك ركبت و وصلت المراوح بتوعك و عاوز تعرف انت عندك انهى نوع ضغط، هتجيب عود بخور و تحطه عند اى خرم أو مكان مفيهوش مروحة و تشوف الدخان هيروح فين. لو دخل جوا الcase يبقى عندك Negative Pressure، لو اتزق بره يبقى انت عندك Positive Pressure، لو فضل زى مل هوا و ده نادر يبقى عندك Neutral Pressure.


About the author

Ahmed Elmayyah

Just a guy that loves to craft, play videogames, read comic books, code and build computers. Also a huge technology geek and computer enthusiast