Cosplay

محادثة مع فؤاد عادل عن صناعة ال Cosplay!


انتشر فى مصر الفترة الاخيرة حاجة اسمها Cosplay بمعنى انك تلبس زى شخصيتك المفضلة سواء فى حفلات او اماكن معينة او حتى تعمل ال Cosplay بنفسك ال Cosplay انتشر فى مصر بسبب كذا حاجة سواء أفلام ال Superheros اللى بتنزل أول بأول او ال مسلسلات ال Anime  اللى انتشرت اكتر فى الوطن العربى… فعملنا محادثة مع فؤاد عادل لانه من الشخصيات اللى ابهرتنا بالشخصيات اللى قدر يجسدها فى الحقيقة.

 

-عايزين نعرف الناس عليك؟

فؤاد عادل عندي 23 سنة و في تالتة ميكانيكا جامعة القاهرة , الدراسة هي اخر اهتمامتي , بشتغل في شركة عرب هاردوير و حابب شغلي جدا الحمد لله و حاليا اكتر هواية بحبها و تعتبر شغل جانبي هي الكوسبلاي أو ال Prop Making.

 

-ايه اللى خلاك تتجه للمجال ده؟

و الله في الاول كنت بحب الموضوع اني اتفرج كدة و خلاص و حاجة حلوة انك تشوف شخصيات بتحبها تبقى حقيقية و عمري ما فكرت اعمل حاجة علشان عارف اني معنديش اي لمسة فنية و فاشل في اني اعمل حاجة , بس لما عملت أول حاجة كان شعور حلو جدا اني احس اني عملت حاجة با ايدي حتى لو وحشة بس هي حاجة انا عاملها , و من ساعتها بقى ادمان و مش عارف ابطل.

 

-اتعلمت تعمل الكوسبلاى ازاى و فين؟

بدأت اتعلم الكوسبلاي في 2014 في اندونيسيا كنت خاطب ساعتها كوسبلاير من اندونيسيا و هي اللي علمتني و بمساعدتها هي و  صحابها عرفت اعمل اول حاجة Commander Shepard متعلمتش حاجات كتير بس شوفتهم و هم بيشتغلوا و فهمت أساسيات الفووم على الأقل , بعد كدة كمل اتعلم اونلاين و اشوف فيديوهات و جربت و بوظت حاجات و خسرت فلوس كتير اوي 😀  بس كانت تستاهل.

 

-كان ايه اول كوسبلاى ليك؟

اول حاجة ليا هي Commander Shepard بس معملتهاش 100% لوحدي في مبحسبوش انه أول حاجة , فأول حاجة اعملها لوحدي كانت Death بس كان وحش أوي أوي فمبحسبوش برضه , بعدها Ironman كان أول حاجة اعملها باستخدام برنامج اسمه Pepakura و ماكينة قطع ليزر فكان تجربة و وحش فمتحسبوش 😀 بعدين نيجي ل Hulkbuster عملت اغلبه لوحدي و حلو بس برضه مش لوحدي 100% ف للاسف أنا لسة معنديش أول حاجة أقدر أقول هي دي , بس حاليا شغال على حاجتين هيبقوا هم دول ان شاء الله.

12747531_583213698511408_7940201141060927194_o

-استخدمت ايه فى صناعة الكوسبلاى بتاعك؟

فووم , لحد دلوقتي كل شغلي بالفووم و أنواعه و بدخل معاه خشب أو PVC أو حاجات على حسب الحاجة بس شغلي كله في الاساس فووم.

 

-ايه اللى بتكسبه من انك تعمل كوسبلاى مثلا؟

اني ببقى مبسوط بجد من غير محن والله بس فعلا ببقى مبسوط جدا , على قد ما في حاجات بتدمرني نفسيا و أنا بعملها بس لما بتخلص ببقى عامل زي واحدة لسة مخلفة و بتبص لابنها في عينية و صورة Hulkbuster تثبت الكلام دة 😀 و برضه ساعات بعمل حاجات بفلوس ساعات بيبقى ورا الموضوع فلوس كتير و ساعات فلوس بسيطة و ساعات بعمل حاجات لناس من غير فلوس بهدف اني اتعلم حاجة جديدة مش اكتر.

 

-طب كان سهل؟

أنا واحد معندوش اي لمسة فنية بأي شكل , اخري ارسم شمس في ركن الصفحة زي ما كنا بنعمل في ابتدائي , و مع ذلك شايف الموضوع مش صعب أوي و حبة فيديوهات و حاجات اونلاين و بتعلم منها فالموضوع نسبيا سهل اه.

 

-تقدر تتكلم عن اسلوبك؟

في حاجات بعملها ب اني اشوف صور من اكتر من زاوية و اجرب و اعملها بنفسي من غير أي مساعدة و في حاجات بيبقى اشكالها جاهزة عن طريق برنامج اسمه Pepakura مفيش حاجة 100% بتكون جاهزة دايما لازم تخلص حاجات با ايدك و تطلع مش مظبوطة و دة طبيعي و اني اعمل حاجة من صور أو تكون برنامج بيسهل الموضوع الاتنين ليهم فوايد مختلفة و كل حاجة على حسب الاحتياج و الوقت , و مليون خط تحت الوقت

 

-تقدر تقولنا ايه الادوات اللى انت استعملتها فى اول كوسبلاى ليك؟

أدواتي دايما بتكون فووم بتاع الشباشب دة من العتبة و كاتر و حبة كلة و اتوكل على الله , دلوقتي ساعات بستخدم ماكينة ليزر أقطع بيها و بدأت استخدا غرا ابيض لما ببقى عاوز ادي الحاجة شكل حلو , و ألوان حسب الاحتياج.

 

-ليه استعملت شخصية Iron Man كتانى كوسبلاى رسمى ليك؟

ironman ببساطة كانت أو مرة أجرب برنامج Pepakura و البرنامج دة لما حد بيجي يتعلم علية في حاجة كبيرة 90% بيعمل ironman فكانت فرصة اننا اتعلم و افهم حاجة جديدة و كمان بيكون شكلها حلو في الصور.

13089960_10154087944021054_1030826010_n

 

-بس iron man مكانش خلصان تقدر تقولنا ليه؟

الوقت كان ضيق و كنت بشتغل ساعتها في call center و كنت بعمله في وقت فراغي دة زائد الجامعة و غيره فمكنش فية وقت كافي للاسف.

 

-شخصية/تمثال Hulk Buster خد منك اد ايه؟

تقريبا 3 شهور كنت بدأت في أول أو نصر شهر واحد و خلص اخر شهر مارس.

13090070_10154087936866054_241750533_n

-ازاى حصلت على التصميم و قدرت تعمله بالحجم ده؟

التصميم كان متوفر جاهز اونلاين بس كان معقد شوية علشان معمول ان بني ادم يلبسه عادي , عدلت علية و كبرت المقاسات , المفروض كان يبقى 4 متر بس نظرا لضيق الوقت اللي بيحصل دايما في بعض الاجزاء معملتهاش عند المفاصل فانتهى بأنه يبقى 3.7 متر , المفروض انه في الفيلم 3.3 متر و على حسب علمي كان أكبر حجم اتعمل في الحقيقة هو ال 3.3 متر برضه.

 

لو عايزين تعرفوا اكتر عن الكوسبلاى اللى بيعملها و الحاجات اللى شغال عليها دوسوا على اللينك ده: Fate – Fouad Adel


About the author

Seif Aldin