انمي مراجعات

مراجعة انمى One-punch man!


سنة الاصدار: 2015

النسخة: Subbed

مرخص من: DAISUKI

نبدأ بقى
بصوا يا جدعان خلينا نتكلم كفنين “ألش من اولها” الانمى ده ممكن نتكلم عليه من ناحيتين
الناحية الاولى: و هى انك بتتفرج على انمى اكشن-كوميدى عادى و بالتالى بما اننا شعب عميق و بنحب نناقش قضايا المجتمع فاحتمال تلاقى ناس بتقولك ده انمى فستك كله اكشن بس فين القصة فين التويست فى القصة… بس هم ممكن للاسف يبقى عندهم حق … حتى لو مش بيقدروا الاكشن الكويس بسبب ال animation الجميل اللى فيه و بما ان الانمى كوميدى فلازم الناس تفهم ان اللى بيضحكك ممكن ميضحكش غيرك
و طبعا اول حلقة اما نزلت وقتها كله اتحول ل “Roger ebert” “ناقد مشهور” و شفت كومنت جميل اوى الشخص كان كاتب ساعتها انه القصة 0/10 على اساس انه شاف الانمى كله فى حلقة ما علينا كل واحد ليه الحق انه يقول رأيه
بعد 3 او 4 حلقات دخلت على نفس الجروب و ما شاء الله معظم الناس كلها عملت اشتراك فى نادى محبين onepunch man
و اما حد بقى بيناقشهم فى العكس و انه مش للدرجة ديه بيقيموا عليه الحد ساعات “بيحاول يألش تانى”

طب هو كده فى قصة و لا لأ و لا انا بيضحك عليا دلوقتى و لا ايه

انا عن نفسى شايف انى من النوع التانى من الناس و هو لو فهمت بالظبط المطلوب من الانمى هتتمتع زيادة عن اللزوم
النوع التانى: انه شاف انمى من نوع Shounen كفاية لانه يحفظ الرتم اللى بيمشوا عليه
زى naruto و fairy tail و one piece و bleach جبت سيرة دول عشان اشهر حاجة

فيهم البطل بيبدأ زى الكتكوت الضعيف و يفضل يدرب لحد اما يبقى فرخة بريش و يحى اصحابه و اخواته الكتاكيت لحد اما يبقى اقوى فرخة فى العشة “بفكر مألش تانى…”
قبل ما تقول ساعات بيبقى فيه شواذ للقاعدة ديه ممكن تقول حاجة زى nanatsu no taizai او log horizon و للاسف Sword art online فيهم الابطال فراخ من اول حلقة و ممكن يطوروا و يبقوا ديوك بعدين “حد يناولي الحزام من جوا”

فاما شفت الانمى لقيت ان شخصية saitama فوق كل الشخصيات اللى ظهرت فى الانمى مش محتاج يدرب عشان يغلب عدوه اللدود اللى قتل عشيرته كلها و صمم انه يقضى الى 700 حلقة الجايين انه يدرب عشان يخربها بل العكس تماما سايتاما تقدر تقول عليه تمثيل فعلى للقوة المطلقة و اما اتسأل عن انه ازاى عنده القوة قالهم ادربت لمدة تلت سنين ربيتلى عضلتين و الحمدلله على كده محتاجوش يعملو حلقات filler يفضل يوريك ازاى ربى السمانة بتاعته و بقى كل هدفه انه نفسه يلاقى شخصية تانية قدامه يعرف يحاربها الواد نفسه يضرب يا جدعان حسوا بيه شوية….”ما علينا”

بس مع ان سايتاما جامد كده اما تيجى تبص لكل الشخصيات اللى معاه و اللى ظهروا فى الانمى فهم بيمثلوا اى انمى shounen شفته فى حياتك الفرق ان المؤلف ظابط الدنيا في الكلام ده و مش بيستهبل و ال fights من احسن ال fights اللى شفتها بقالى فترة فى اى انمى … ازاى ده بيكسب بضربة واحدة بس
ما هو معلش المؤلف مش هيتعب نفسه و يعمل webcomic … اه كانت webcomic قبل ما تتحول لmanga و و مش هتاخد الشهرة ديه كلها و هو رسمه اوحش من خطى فى الكتابة “<_<”
الراجل عامل توازن فى مجرى الاحداث زى الفل .. اه انت عارف انه هيجى و هيكسب بضربة واحدة بس برده فى نفس الوقت بتحب تشوفه و هو بيعمل كده عشان هو شبح

الanimation فى الانمى ممتاز و ده المعتاد من استديو Mad house
و بيظهر حلاوته اكتر فى الfights لاحظت ان فيه مرونة فى حركات الشخصيات لو عايز مثال على كده شوف انمى اسمه kids on the slope فيه مشاهد انت ممكن تستغرب و تقول هم بيتحركوا كده ليه … الفكرة انك مشفتش الاسلوب ده قبل كده و ده اللى حصل معايا عموما بس بما ان الاسلوب مستخدم فى الاكشن بطريقة فظيعة بيحسسك بعظمة المشاهد اللى بتشوفها

تصميم الشخصيات كله كويس كل شخصية مختلفة عن التانية و من احسن التصاميم هى سايتاما … لأ مش genos او boros او اى حد ظهر
تصميمه حتى بيوضح صفات الشخصية فى كل موقف حتى الاداء الصوتى ليه ممتاز بيتكلم بطريقة تحسسك انه زهقان و مش لاقى حاجة تفرحه و التغييرات اللى بتتحول على تصميم الشخصية اكنهم شالوها من المانجا و حطوها فى الانمى بنفس الشكل بنفس كل حاجة من غير لعب فى التفاصيل.

بعد الشرح الطويل اللى اتقال فوق و وضحت ان عادى انك ممكن تشوفه من ناحيتين
بس الحاجة اللى الناس هتشترك فيها انه على الاقل ممتع او الاكشن اللى فيه احسن من غيره
الموسيقى زى الفل فى الاول مكنتش مقتنع بالopening بس بعد حلقتين تلاتة حسيت بالادرينالين و انى عايز اقوم اضرب فى صحابى شوية و اللى عاجبنى انها كانت مناسبة تماما حتى فى اخر حلقة

نيجى بقى للطريقة اللى قفلوا بيها الموسم … قفلوها بطريقة بسطتنى مش زى انمى تانى مش عايز اقول اسمه: Tokyo ghoul او deadman wonderland او high school of the dead او no game no life بالمرة نحط attack on titan قفلتهم كلها زى الزفت

-ايه ده ازاى بتغلط فيهم ؟!؟!؟!؟!!!!
=انا بغلط فى القفلة بتاعت الموسم … ايش عارفنى ان هيبقى فيه جزء تانى او على الاقل انهى اللى انت بدأته فى نفس الموسم و مهد للى ممكن يحصل فى الموسم اللى جاى … لكن متجيش فى اخر حلقة تعمل تبنى فى القصة و تقول سنعود بعد قليل و قليل ديه بتبقى سنة او فى حالة صاحبنا التانى attack on titan داخل خلاص على تالت سنة بس على الاقل عرفوا يعملوا نهاية مناسبة شوية…. لحد اما تشوف ان جوا الحيطة titan و يقفلوا على كده و الناس تضرب دماغها فى الحيطة ،محدش يطلع يقولى tokyo ghoul نزلوا موسم كمان مش طالبة فقاقة انا بتكلم على وقتها للناس اللى كانت بتتفرج عليه

مش هزود كتير عشان منطلعش بره ال review “على اساس انك كده مطلعتش -.-“

الناس اما بتضحك ياما بسبب الكوميديا اللى بتحصل ما بين الشخصيات بسبب ان شخص ما قال حاجة بتضحك او نوع تانى من الكوميديا اللى بتتجسد فى المواقف و ده عاجبنى اكتر فى الانمى ان الكوميديا سلسلة سواء فى الاكشن او ما بين اتنين بيتكلموا عادى
السيناريو نفسه ممتع الجمل اللى بتتقال ساعات فيه ممكن تعبر عن حاجات حقيقية فى سياق الاحداث

و بما ان الكوميديا جزء منه … الواحد مش بيجى يسال ايه ده ازاى بنوا المدينة بعد اما اتدمرت كل ده
لو ده المنطق بتاعك يبقى انت فى البلالا لاند اكنك بتقول اشمعنى light اما بيكتب اسم واحد فى ال death note بيموت بعد 40 ثانية … اشمعنى ال 40 ثانية ليه مكتونش 60 ثانية و نختم الدقيقة عشان نرتاح نفسيا مينفعش كده يا جماعة

اما تجمع كل الكلام اللى فوق ده هتطلع بحاجة ان الانمى اكشن-كوميدى قصته خفيفة و هى ان البطل نفسه يلاقى حد يسد قدامه … لو ركزت ممكن تشوف ان سايتاما معمول كده عشان يتريق على وضع ال shounen اللى مترمى فى كل حتة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
التقييم: لو هلخص اللى اتقال فوق فكل اللى هقوله لو بتحب الاكشن و بتحب الكوميديا و ممكن تضحك عادى اتفرج عادى لو بتدور على قصة عميقة و طه حسين اللى جواك مش هيقدر يشوف انمى قصته خفيفة شوف حاجة زى ergo proxy و لو قلت انه تقيل و بارد يبقى انت مش عارف انت عايز ايه

و بالمناسبة لو سألتونى مين الى يكسب جوكو او سايتاما؟
هقول Whis اللى ضرب Beerus god of destruction اللى هزم جوكو
غير كده هقول جوكو

ليه؟
-عشان حاليا معرفش ال limit بتاع سايتاما فين و ده اصلا مش سؤال مش كل واحد يطلع فى المقدر نقول انه يغلب جوكو… و زى ما قلت ان سايتاما معمول حاليا كتريقة على شخصيات ال shounen المعروفة ده جتى اقرع

بس عادى يعنى يا جدعان ممكن قدام لو اتعمل كذا موسم نشوف ان فى شخصيات ممكن تضرب سايتاما ساعتها ممكن نقدر نعمل مواجهات و برده فكرة ان سايتاما معمول تريقة على الشخصيات shounen هتفضل لسه موجودة لانهم بانوها صح فى اول موسم و ناس كتيرة فهمت الموضوع.


  • قصة - 8/10
    8/10
  • الإخراج - 9/10
    9/10
  • موسيقى - 9/10
    9/10
  • الشخصيات - 8/10
    8/10
9.0/10

About the author

Seif Aldin