العاب مراجعات

مراجعة 2 Dishonored


الجزء الاول من Dishonored كان بالنسبالي افضل لعبة اتقدمت في 2012, العاب كتيرة كانت حلوة في السنة دي بس اللعبة دي بالتحديد كانت فيها حاجة مميزة و مختلفة عن باقي اللعب و احياء لفكرة و اجواء الالعاب الـFirst Person Stealth Action اللي بداتها سلسلة Thief و كانت Dishonored برضو ليها طبع مميز و خاص بيها من ناحية الجيمبلاي وراه مطور زي Hervy Smith ليه تاريخ مع العاب First Person مهمة جدا زي Deus Ex و System Shock.
الجزء التاني كان فيه اضافات كتيرة جدا كان اولها امكانية اللعب بشخصيتين مختلفين عن بعض لكن الاجابة هل من الممكن يحتفظ بمكانة الجزء الاول … هجبهالكم من الاخر و هحرق عليكم حكمي النهائي علي اللعبة Dishonored 2 ببساطة شديدة في وسط اللي لعبته في 2016 لحد دلوقتي هي افضل لعبة لعبتها في السنة دي.

القصة :

بداية بالقصة و هنا الاحداث بتيجي بعد 15 سنة من قصة الجزء الاول و Emily Kildwinاللي كانت طفلة في احداث اول جزء بقت هي الامبراطورة الحاكمة لـDunwell بمساعدة Corvo بطل الجزء الاول
و اللعبة مبتاخدش وقت طويل تماما و تدخلك في قلب الاحداث زي الجزء الاول علي طول بانقلاب بيحصل علي Emily و خيانة مجموعة من الناس التابعين ليها تحت قيادة واحدة اسمها Dilailah.
من هنا بقي في نقطة مهمة بالنسبة للقصة و السؤال اللي بيتسأل دايما مع اي جزء جديد من اي لعبة. هل من الضروري لعب الجزء الاول عشان يتفهم الجزء التاني بيحصل فيه ايه ؟؟ الاجابة هي الي حد ما اه و بالاضافة للـDLC التاني Brigmore Witches, هو انت مش هيفوتك كتير بس في تفاصيل بسيطة بس كتيرة في العدد في الحوارات و في الاحداث محدش هياخد باله منها الا لو كان لعب الجزء الاول و الـDLC دا.
لكن غير كده القصة من ناحية الاحداث و التسلسل بتاعها كانت بسيطة, Dishonored 2 مش بتحاول انها تقدم قصة ممكن تكون ليها حبكة معقدة او طالبة منك مستويات عالية جدا من التركيز و انت بتابع احداثها و دا مضايقنش الحقيقة لان في نقطة مهمة جدا اللعبة قدمتها و هي تاثير الاختيارات علي بعض جوانب القصة بشكل الحقيقة كان في اهتمام اكتر من ممتاز بيه
الاختيارات ابتدت بفكرة وجود شخصيتين فا بتشوف من خلالهم جمل حوارية مختلفة نظرة مختلفة علي الاحداث من كل جانب
بحيث ان كورفو مر في الجزء الاول بالاحداث اللي مليانة غموض و الميثولوجي اللي من حواليه
و ايميلي مستجدة علي كل الكلام دا
و تفاصيل تانية تخص تنفيذ المهمات و اسلوبك في اللعب زي الجزء الاول
اللي استغربت منه ان اللعبة بتناقض تصريح اتقال قبل نزولها انك بتختار ما بين ايميلي و كورفو زي ما تحب لحد نقطة معينة في القصة بتستمر بشخص واحد
لا انت هنا بتختار شخص للعبة كلها بصراحة الموضوع مكنش فيه مشكلة بس دا خلاني استغرب التصريحات اللي اتقالت قبل كده
بس عموما لو هعيب علي القصة في جانب معين هو ان في بعض الشخصيات و خصوصا الاهداف المطلوب منك تقتلهم كنت اتمني يكون ليهم مساحة اكبر لعرض شخصياتهم لان فعلا اللعبة خلت ليهم بعض التفاصيل الصغيرة اللي تشد انتباه الواحد خصوصا كيرين جيندوش.

الجيمبلاي :

الجيمبلاي Dishonored 2كان عبارة عن تطوير بشكل ممتاز علي الافكار الاساسية اللي قدمها الجزء الاولاني
و التطوير كان بيبتدي من جانب الاختيارات و تحديدا لما بتختار الشخصية اللي بتقدر تلعب بيها طول اللعبة سواء ايملي او كورفو
لان لكل واحد منهم قدرات و اسلوب مختلف في طريقة اللعب
انا شخصيا ابتديت اللعبة بايميلي و لعبت البلاي ثرو الاولاني اللي استمر 15 ساعة كله ستيلث و اللعبة بتقدم تقدم كبير جدا لمساحات الارتجال بالقدرات و الادوات اللي معاك و خصوصا مع ايميلي
لان كورفر اللي بيقدمه مالوف و معروف من الجزء الاول اه في تطويرات جديدة علي ادائه لكن ايميلي كان الوضع معاها مختلف
لان اللعبة من غير ما تقولي اني ممكن اعمل كذا و كذا بكتشف بقدراتها اساليب لعب عظيمة
علي سبيل المثال في Spell معاها اسمها Domino دي بتربط تاثير ممكن يحصل لشخص معين بكذا شخص تاني من موت او اغمائة
فا بعد لما اعمل حاجة زي كده مع كذا شخص اروح استخدم Spell تانية و هي Doppleganger عشان اعمل نسخة مزيفة مني و اربطها بيهم بالـDomino Spell واتفرج عليهم و هما طالعين يجرو ورا المستنسخ و لما يموتوه تاثير الموت يتنقلهم و يموتو كلهم.
هل اللعبة قالتلي اعمل الكلام دا ؟؟ لا ,هل في تلميح حتي لامكانية دمج الـSpells بالشكل دا ؟؟ برضو لا.
اللعبة سايبة اللي بيلعب يرتجل و يكتشف حدود الجيمبلاي بشكل عظيم ,ايا كان اسلوبك اكشن او ستيلث او هتلعب بايميلي او كورفر هتلاقي نفسك ادام جيمبلاي مرضي جدا و بتبتكر اسلوبك و استراتيجيتك في اللعب بشكل اكتر من رائع بينقل فكرة الارتجال اللي اتقدم في اول جزء لمستوي عظيم و ممتاز.
و في سكيلز تانية من الممكن تندمج مع بعض بنفس الشكل دا بالاضافة لكمية من الادوات زي القنابل و الالغام
و الاسهم اللي بتتنوع بشكل ليه تاثيرات محددة علي انواع مختلفة من الحراس و التعديلات اللي ممكن ترفع بيها اداء الاسلحة اللي معاك.

و يضاف علي كده مستوي ذكاء الحراس اللي كان حلو جدا من انتباهم الشديد و شكهم لما بيحصل اي حاجة غريبة من حواليهم من اصوات او يشوبو ابواب مفتوحة و طبعا مستوي خطورتهم العالي اللي مينفعش انك تستهين بيه. خصوصا من الـClockwork Soldiers اللي هما مجموعة Robots بيشوفو من اتاجاهين و هيصعبوا عليك اي مهمة بيكونو موجودين فيها
و في جوانب كتيرة في اللعبة متاثرة بوجود شخصيتين منوعين في القدرات او ببعض التفاصيل في القصة او بعض التفاصيل اللي هنتكلم عنها بعد شوية تخلي اللعبة صعب بعد لما تخلصها لاول مرة تقول انا شفت كل حاجة في اللعبة. اللعبة فعلا محتاجة من اللي بيلعب يخلصها مرتين علي الاقل عشان يكون شاف محتواها و افكارها بنسبة كبيرة.
اللعبة برضو بتلمع بشكل كبير في جانبين و هما تصميم المهمات و تصميم المراحل.
من ناحية تصميم المهمات تحديدا زي الجزء الاول اللعبة بتضمن حرية طريقة تنفيذ الهدف باشكال مختلفة و متنوعة و ضرورة استكشافك للاماكن من حواليك لانك من الممكن تكتشف وسايل تقتل بيها الهدف المطلوب بشكل غير مباشر.
او تنهي خطره عليك في احداث القصة من غير ما يموت دا نفس اللي كان موجود برضو في الجزء الاول و الاساليب الجانبية الحقيقة كان معظمهم افكارهم حلوة جدا و في حالة ارضاء عظيمة لما تنفذهم خصوصا لو كان اسلوب لعبك كله ستيلث
الحلو برضو وجود بعض التفاصيل في الاختيارات اللي انت ممكن تنفذها ليها تاثيرات مباشرة علي القصة
او تاثيرات علي المسار العام للمهمة من ناحية الجيمبلاي
زي بعض المهمات الجانبية او اللي بشكل ادق اقول عليها مطالب جانبية ممكن متقربش منها لو حابب ساعات ليها تاثير علي مسار المهمة
و حاجة تانية تخلينا نخش في الكلام عن تصميم المراحل
لان في Dishonored 2 في ميزة حلوة جدا في المراحل و هي ان باستكشافك ليها تقدر توصل لاختصارات توصلك للهدف او لاماكن كتير بشكل يخليك تحس بالتشعب و التعقيد اللي موجود فيها
يعني علي سبيل المثال في واحدة من المهمات عشان توصل منها لهدفك بتلاقي ان زي لغز يعتبر اكبر لغز في اللعبة عبارة عن باب خزنة مطلوب منك فتحه
و لاول مرة من ساعة Silent Hill 2 الاقي ان في لغز يخلي اللي بيلعب يسيب اللعبة و يحاول يحله بورقة و قلم
و الموضوع مش اجبار لو عاوز تجيب الحل
في واحد من المطالب الخاصة المقسوم لجانبين في جانب منهم بيوديك لمكان لو دورت فيه كويس هتلاقي حل اللغز
ولكن مش دي الميزة الوحيدة في تصميم المراحل Dishonored 2 بتعلي بشكل كبير فوق ميزة التشعب و التعقيد في التصميم لانها اتقدمت في الجزء الاول و ممكن نشوفها في العاب Stealth Action تانية زي Hitman اللي نزلت السنة دي
اللعبة قدمت اكتر من مرحلة كان التصميم فيهم فيه افكار اقل ما تتوصف بانها عبقرية و مميزة
علي سبيل المثال مهمة Clock Work Mansion تاني مهمة مفضلة عندي في اللعبة
المهمة دي المكان اللي انت فيه من الممكن تغير شكله و ملامحه بطريقة مش هلاقي تشبيه اقرب من مكعب الروبيك عشان اوصف التغيير الشكلي اللي بيحصل من خلاله و دا بيحول الليفيل كله للغز في كذا جانب زي جانب انك تلم الكولاكتبلز اللي بتطور بيها قدراتك, جانب تفادي ان حد يشوفك , جانب انك توصل للهدف المطلوب قتله و جانب انك تحاول توصل للطريقة البديلة لقتل الهدف.
انا شخصيا اعتقد ان من الممكن اصلا يطور لعبة كاملة فيها حل الغاز مبنية بس علي تصميم مرحلة زي الـClock Work Mansion
المهمة التانية و هي المهمة الافضل في اللعبة ككل وشخصيا كنت اتمني المهمة دي متتعرضش في دعاية اللعبة وقت E3 اللي فات و تتساب مفاجأة كانت مهمة السفر عبر الزمن
الفكرة الخاصة بالسفر عبر الزمن في العاب تانية قدمتها سواء جزء من اجزاء Legend of Zelda اولعبة زي Singularity حتي في لعبة نزلت السنة دي كانت فيها الفكرة بشكل مفاجئ و مش هقول ايه هي اللعبة عشان محرقش
بس في Dishonored 2 الفكرة كانت بمستوي اعلي و اعمق و مختلف تماما من ناحية فرض فكرة السفر عبر الزمن علي كم كبير التفاصيل في الاختيارات و الالغاز و الـSealth Mechanics و المنظور اللي بتشوف بتشوف بيه القصة علي مدار احداث المهمة خلي المهمة دي مش افضل مهمة في اللعبة بس هي افضل مهمة انا لعبتها في قصة لعبة Single Player السنة دي
انا شخصيا لو حاولت اني ادور علي عيوب في الجيمبلاي مش قادر بسهولة اني الاقي من فترة لعبي حاجة تخليني اقول دا عيب كبير و مؤثر . يمكن في مرتين تقريبا كان ساعات بشوف الـAI بيتحرك بشكل غريب واضح انه كان فيه زي Glitch.
كذا مرة الـFar Reach Spell بتاعت ايملي بتكون مش دقيقة اوي لما اظبط نفس اوصل لمكان عالي بالتحديد
هي محصلتليش كتير بس كانت ملحوظة عشان انك اتكشفت بسببها في مرة
تاني حاجة كنت اتمني وجود مهمة زي مهمة حفلة Lady Boyel اللي كانت في الجزء الاول علي سبيل الفان سيرفيس و تكون مهمة قريبة شوية في افكارها من Hitman بحيث انك ممكن تخلصها بشكل كامل قايم علي التلاعب في تفاصيل من حواليك و انت موجود وسط عدد كبير من الناس

الجرافيكس و الاصوات:
بعيد عن الجيمبلاي تعالو نتكلم عن اداء اللعبة بالتحديد عشان دا كان موضوع سخن شوية خصوصا علي البي سي في الفترة اللي فاتت لو حد لسة هيلعبها علي الكونسولز فا اطمنو اللعبة مفهاش مشاكل ,لكن علي البي سي اللعبة وقت ما نزلت كان فيها شوية مشاكل و مرت بكذا مرحلة بكذا ابديت
و انا شخصيا جربتها باعدادات مختلفة بجهازي الشخصي و اداء اللعبة كان عندي فيه مشاكل اكتر من المشاكل اللي كانت فيها لانها كانت بتعاني من استهلاك عالي للبروسيسور بشكل مبالغ فيه دا بالاضافة لـGraphics Options مش شغالة كويس زي الـTXAA
فا ساعتها لاحظت ان في مشاكل انا شخصيا بزودها علي نفسي باستخدام بروسيسور Core i5 جيل تاني كانت مخلية متوسط الاداء 45 .FPS.
و وقت لما جددت الجهاز بدات تنزل تحديثات للعبة حسنت بشكل كبير من ادائها و صلحت مشاكل الاستهلاك العالي للبروسيسورات و الـTXAA و ضافت اختيارات تانية للجرافيكس منها علي سبيل المثال هل انت عاوز الفيران و الحشرات يكون ليهم ضلال ولا لا
و متوسط الاداء حاليا عندي بقي 80 FPS بالمواصفات الموضحة قدامكم
Motherboard : Gigabyte Z170 D3H
CPU : Core I7 6700K
Rams : Corsair LPX 16GB DDR4 3000 MHz
GPU : Zotac GTX 1070 Amp Edition
Storage : Samsung EVO SSD 120 GB

طبعا انا حاولت اني اشوف علي الانترنت هل الشكاوي قلت ولا لا بس في اجماع علي انه حل بنسبة كبيرة مشاكل نزول اللعبة , انا شخصيا شايف ان في مساحة لتحسينات اكتر لان اللعبة المحرك بتاعها نسخة متعدلة من محرك لعبة DOOM اللي نزلت السنة دي و كانت من افضل الامثلة للالعاب اللي شغالة باداء ممتاز حتي بمستويات في الـ Particle Physics اعلي من Dishonored 2
فا لولا التحديثات دي لو كنت قدمت المراجعة بدري كنت هنصح اي بي سي جيمر يأجل اللعبة شوية بس كويس ان اللعبة اتظبطت بدري بدري عن كده.
بس في الجانب التقني و الفني بالذات Dishonored 2 بتقدم حاجة مميزة جدا اللعبة بتستمر بنفس الاتجاه الفني للجزء الاول اللي هو عرضها بـCell Shaded Graphics لكن فيها كم اكبر من التفاصيل عكس اي لعبة تانية بتتعرض بنفس النوع دا من الجرافيكس
المناظر من بعيد في اللعبة بتبان كانها مرسومة و شكلها بيبقي جميل جدا بتنوع ممتاز في الالوان بتوزيع و مؤثرات اضاءة حلوة جدا
و علي رغم ان في مناظر زي خلفيات ثابتة مينفعش انك تروحلها برجلك لان اللعبة عالمها مش مفتوح .. بس المناظر من بعيد جميلة جدا
لكن كل ما تقرب تبتدي تلاحظ ان في تفاصيل اكتر و اكتر مايلة لنسبة واقعية في عرضها خصوصا في تفاصيل وشوش الشخصيات
اللعبة ككل بتدي احساس ان الواحد بيلعب وسط رسومات فنية او Concept art اللي بيترسم عشان يحدد الاتجاه العام لشكل اي لعبة
في ناس كتير عارف انهم بيفضلو الشكل الواقعي للجرافيكس لكن الللي موجود في اللعبة هنا مديلها شخصية و طبع مميز جدا و متنفذ بشكل رائع.
لكن اللي كان مميز بشكل عظيم في تصميم اللعبة هنا التصاميم الداخلية للاماكن اللي كانت في منتهي الجمال
في اهتمام عالي جدا بالمباني و الشقق في تصميمها من ناحية الديكور و الالوان و توزيع اللوح الفنية و التماثيل بشكل يخليني بسيب المهمة و افضل اتفرج علي اللي حواليا
حتي في تصاميم لاماكن مهجورة و متدمرة و فيها جرعة كئابة و سوداوية زيادة كانت برضو جميلة جدا
البني ادم المسؤول عن التصميم و الاتجاه الفني في اللعبة يعني بصراحة يستحق جايزة لوحده

الاصوات في اللعبة كان في اهتمام شديد جد بيها
الـvoice acting اتقدم من طقم ممثلين ليهم ادوار في مسلسلات تلفيزونية زي Game of Thrones و Daredevil و Narcos
و ادائهم كان في اللعبة ممتاز و خصوصا الاهداف اللي مطلوب منك قتلهم
و كان في اهمية كبيرة في تصميم الاصوات في البيئة من حواليك سواء في انك ممكن تستغلها لصالحك من صوت خطوات الرجلين و كلام الحراس اللي ساعات ممكن يفيدك في تنفيذ المهمات
و الساوند تراك في اللعبة ملحنه نفس الملحن اللي قدم ساوند تراك اول جزء اللي هوDaniel licht اللي اشتغل علي ساوند تراك مسلسل Dexter
و شغله في اللعبة كان ممتاز و بيلعب علي الاجواء اللي انت بتتحط فيها و يخليك مندمج و بيكون حماسي لو انت دخلت في مواجهات مباشرة و هادي و بسيط لو اعتمدت علي الـstealth و ساعات فيه Horror elements بسيطة في بعض المهمات

للناس اللي لعبت اول جزء من Dishonored الجزء التاني بالنسبالك من الممكن يجدد اعجابك بالفكرة الاساسية اللي قام عليها تصميم السلسلة
بس لو انت شخص جديد علي اللعبة و بحب الالعاب الـStealth Action انصحك انك تحاول تلعب اول جزء باضافة Brigmore Witches او علي الاقل تشوف Walkthrough ليها علي اليوتيوب عشان تقدر بنسبة كبيرة مطلع علي جوانب القصة
لان Dishonored 2 لعبة قدمت امتياز في تصميم المراحل و تصميم المهمات و تنوع جوانب حرية الشخص اللي بيلعب عشان يقدر يخلص اي مهمة
اللعبة قدمت قيمة كبيرة في المحتوي بتاعها علي رغم من كونها لعبة خطية تدفع و تشجع اللي هيلعبها انه يكرر التجربة و يعيدها كذا مرة مش عشان Achievemnts او Trophies انما عشان فعلا في مرونة في اللعبة تخليك عشان يبقي اسمك شفت كل المحتوي و الافكار اللي بتتقدم لازم تلعب كذا مرة.
و اللعبة كانت حالة فنية في منتهي الجمال سواء اللي بتشوفه قدام عينك او من اللي بتسمعه
و زي ما قلتلكم في اول المراجعة المستوي العظيم في تصميم اللعبة ا في جوانب كتيرة يخليها في وسط العاب 2016 اللي لعبتها لحد دلوقتي … بقول اهه لحد دلوقتي عشان السنة لسة مخلصتش .. اللعبة فعلا كانت في الافضل و فعلا قدرت تكون فوق مستوي توقعاتي في تصميم الجيمبلاي بالذات


About the author

skproductions