العاب مراجعات

مراجعة For Honor


شركة زي Ubisoft  بشكل كبير في خلال السبعة سنين اللي فاتو كانو دايما مركزين في العابهم علي تقديم فورميلا او تركيبة معينة في تصميم العاب موجهة بشكل اساسي لانها تعتمد علي تقديم تجربة Single Player و دايما الفورميلا دي كانت مألوفة و معتادة و ساعات مش بيكون فيها تجديدات او تغييرات جذرية.

و لكن في ديسمبر 2015 الشركة قدمت Rainbow Six Siege كلعبة Shooter بشكل تنافسي صرف و من هنا ظهر اتجاه جديد لـUbisoft في نوعية العاب من خلال Siege مع الوقت اخدت كم كبير من الاهتمام و التحسينات من جانب الشركة غيرها بشكل كبير عن وضعها وقت نزولها و سياسة مادية عادلة شوية بتوفير محتوي مجاني مع الوقت و دا ادي ان اللعبة كبيرت بقاعدة جماهيرية فيها تقريبا 15 مليون شخص بيلعبها

عندنا For Honor لعبة ممكن نقول انها ماشية بنفس الموديول بتاع Rainbow Six Siege و لكنها لعبة مختلفة تماما فكرة و تصميم و علي مدا فترة لعبي ليها طلعت منها بجوانب ايجابية ممتازة و جوانب سلبية محتاجة اهتمام كبير لتحسينها مع الوقت.

و كالعادة في العاب يوبي سوفت اول جانب نتكلم عنه هو اول جانب بيكون في تركيز لبعض سلبيات اللعبة و هو القصة و اللي هي للاسف الشديد اضعف قصة شفتها من يوبي سوفت لحد دلوقتي و اكتر قصة بشكل عام ممكن انها قابلة للنسيان بدرجات غريبة.

قصة اللعبة مركزة علي صراع بين 3 اطراف بشكل خيالي و محصلش اي اتصال بينهم اصلا تاريخيا و هما فرسان من العصور الوسطي في اوروبا و الـVikings و الـSamuraies.

و باسلوب اقرب لـBattlefield 1 انك بتلعب Campaign  خاص بكل طرف و بشكل عام كلهم علي بعض يخلصوا في 8 ساعات لعب.

ايه بقي مشكلة القصة ؟؟ المشكلة ان الكتابة كانت ضعيفة جدا و حتي مع العاب يوبي سوفت اللي فاتت اللي كانت فيها كتابة ضعيفة للاحداث و التقديم كان دايما في شخصيات تشد الانتباه, هنا بقي اللعبة مفتقدة حتي لحاجة زي كده كمان.

بشكل عام يخلينا نقول ان القصة معمولة بغرض تفادي انتقاد ان مفيش Campaign في اللعبة زي ما حصل مع Rainbow Six Siege, بس دا مش هيخلي في تفادي لانتقاد لضعفها الشديد

و في جانب الجيمبلاي الـCampaign انا ممكن اعتبره هو زي Tutorial لجيمبلاي اللعبة ككل بس علي كبير شوية و كان ماشي باسلوب خطي و فكرني شوية بلعبة زي Ryse Son of Rome و لكن اضافة الـCOOP فيه كانت من الممكن تكون اضافة ظريفة نوعا ما.

طب نتكلم شوية عن الجيمبلاي و ايه هي فكرة For Honor و ايه الجديد اللي بتقدمه. اللعبة بشكل كبير مركزة علي مواجهات فيها نسبة واقعية في استخدام السيوف و الرماح.

و هي بشكل كبير مش لعبة Hack n Slash هي ممكن نقول انها Fighting Game زي Mortal Kombat او Street Fighter, لان For Honor بتقدم 12 شخصية 4 شخصيات لاطراف اللعبة التلاتة تحديدا و كل واحد فيهم ليه اسلوبه في المواجهات المعتمد علي السرعة او توجيه ضربات تقيله او سرعة الحركة و ارباك المنافس.

و لكل شخصية مجموعة كومبوهات مختلفة بتتعلمها و خلتني شخصيا لفترات من الوقت بتمرن مع الـBots او في موجاهات شخص ضد شخص مع صحابي عشان نفهم الشخصيات بيتلعب بيهم ازاي و ازاي ندير الـStamina بتاعت كل شخصية بشكل مناسب ؟ امتي اهجم و امتي ادافع.

تصميم For Honor في جانب الشخصيات و اساليبهم القتالية بصراحة كان ممتاز و مختلف و مش سهل و محتاجة تعلم مستمر.

لان مع احتراف اساليب الشخصيات دي اللعبة بيطلع منها جانب مرضي جدا في كل مواجهة مع كل قتلة تقدر تنفذ فيها كل اللي اتعلمته و دا اللي تقريبا بيكون قلب تجربة اي Fighting Game و For Honor بتقدمه بتصمم ممتاز و مش بتحاول تكون ناقلة تجربة لعبة تانية و تقدم تجربة مختلفة و جديدة مقدرتش اتردد لثانية اني اقدرها و اقدر عدم التضحية بتسهيل اي جانب من جوانبها زي ما Rainbow Six Siege كانت عملت من قبلها.

بس انا في كلام اللي فات حبت اركز علي كلمة معينة و هي قلب التجربة لان في جوانب تانية في For Honor بشكل عام بتكون التجربة ككل في تعليقات عليها.

اولا الـGame Modes المتاحة في اللعبة كان في اكبرهم اللي هو Dominion و دا بيخلي فريقين من 4 اشخاص ضد اربعة تانين مع وجود جيش من العساكر اللي بيتحكم فيهم الـAI و بيحصل تنافس علي احتلال نقط معينة بأسلوب شبيه بـGame Mode زي Domination او Conquest من سلسلة Battlefield كان ممتع جدا و خصوصا مع الاجواء الاقرب للمعارك و اللحظات الاخيرة من كل ماتش اللي مش بيتسمح لاي حد انه يعمل Respawn بعد لما يموت و بيبتدي يحصل تصفية للفريق اللي قرب يخسر باسلوب فكرني بـGears of War.

مشكلة الـGame mode هي ان مع الوقت ممكن يتحس ان مفيش جديد ممكن يتنفذ من خلاله السيناريوهات هتتكرر و خصوصا مع المواجهات اللي بيكون فيها اكتر من شخص ضد شخص واحد و العشوائية اللي ممكن تحصل اللي مش بتدي مجال كبير لاي تخطيط او ستراتيجيات في المواجهات دي.

الـModes التانية في Death Match و دا نسخة اصغر من ناحية حجم الخريطة و عدد الـBots من Dominion و يليه Dual & Brawl و دا Mode من خلاله تنافس علي منظور اصغر من خلال شخص ضد شخص او اتنين ضد اتنين.

الـGame Modes الاصغر سواء Death Match او Dual & Brawl فيهم تجربة افضل و مركزة علي انها تظهر قلب تصميم و تجربة For Honor بشكل افضل من Dominion و ازاي انها تبين الفرق بين الـ12 شخصية و اساليب لعبهم بشكل كويس.

و لكن تعالو نخش في جوانب اهم عليها تعليقات كبيرة في اللعبة و نبتدي بالاخف و هي الـMicrotransactions, اللعبة فيها كم كبييييييير جدا من الاضافات اللي انت ممكن تدفع فيها فلوس حقيقة و الاضافات دي في منها اللي يعتبر شكلي و في منها اللي مؤثر بنسبة معينة علي الجيمبلاي بتعديلات علي الشخصيات بتجيلك بنسبة حظ من الـPacks اللي في اللعبة او انك تفتح القدرات الخاصة بالشخصيات برضو بفلوسك بدون ما تمر علي ال Progression System بتاع كل شخصية.

اللعبة مش حاطة اي حاجة ورا Paywall بتجبرك تدفع فلوس زيادة عشان تاخدها و حتي الشخصيات و الـDLC’s اللي جاية هتبقي مجانية و مش مرتبطة بشكل حصري للـSeason Pass.

و لكن وجود الـMicrotransactions بالشكل دا في اللعبة الحقيقة كمسألة مبدأ دي حاجة مش مستحبة خالص مع لعبة Triple A تمنها 60 دولار, خصوصا ان في جانب ممكن تدفع فيه فلوس و هو الـGears Sets و دي تعديلات للشخصيات بتاخدها مع كل ماتش بتخلصه بتعلي من ادائهم بنسب مختلفة او انك ممكن تفتح كل القدرات بتاعت الشخصيات اللي بتستخدمها في Dominion و Death Match.

في ناس كتير ممكن تقول ان الـMicrotransactions مش هتبقي ليها تأثير علي التوازن بسبب وجود Ranking System في Dominion و Death Match و تعالو نتكلم عن مشكلة تانية في اللعبة بخصوص الـ Ranking System و هي تعتبر برضو ليها تأثير سواء الـMicrotransactions موجودة ولا لا.

دور الـRanking System المفروض انه يخلي كل الفرق تبقي متوازنة من ناحية مستوي الـGears Sets اللي الناس فتحاها, بمعني انك تخش مع حد من نفس مستواك من الاخر. و النظام دا متطبق في  Dominion و Death Match و باقي الـGame Modes الـGears Stats اللي انت بتفتحها مش بتتفعل عشان يخلوها تنافسية اكتر.

لكن في  Dominion و Death Match لاحظت اكتر من مرة اني الاقي حد معايا في الفريق او الفريق التاني الـRank بتاعه ممكن يكون اعلي من مجموع Ranks اللي هو ضده بشكل يؤكد ان النظام مش شغال.

انت مع الوقت ممكن تلاقي تعديلات للاسلحة او الـarmor ليها تأثير ممكن يعلي و يرفع قدرتك بشكل معين و خلوني اضيف برضو ان مميزات تعديل الشخصيات و الاسلحة في اللعبة ممتازة و كبيرة بغض النظر عن الـMicrotransactions بس في حجات كتيرة جدا ممكن تعملها Unlock في اللعبة.

بس كان لابد يكون الـRanking System فعال بشكل اكبر عشان يخلي في شوية عدل في game modes زي Dominion و Death Match و الا لو كان في نية لانهم يبقو مفهمش العدل الكافي و التركيز علي Dual & Brawl من ناحية الجو التنافسي يبقي كده هيبقي في تسؤلات كتير علي قيمة محتوي اللعبة اللي هو اساسا ممكن يثير تسؤولات حتي لو مفيش مشاكل زي الـRanking System او الـMicrotransaction.

لكن كل المشاكل اللي انا اتكلمت عنها دي ممكن تكون بسيطة جنب المشكلة الاهم و اللي فعليا اثرت علي تجربتي ايا كان الـGame Mode اللي بلعبه و هي السيرفيرات و استقرارها و اعتماد اللعبة علي نظام الـPeer to Peer مش الـDedicated Severs.

اولا اكتر من مرة اتعرضت لاني اتفصل تماما من الماتش اللي بلعبه بكذا طريقة سواء اطلع علي الـMain Menu او ان يطلعلي Error Message و كانت بتبقي مستفزة اكتر و اكتر مع كل مرة بلعب و ادائي حلو في الماتش و يروح مخرجني وكللللل اللي انا عملته راح عليا.

تاني حاجة For Honor بتعتمد علي نظام اقرب لفكرة الـPeer to Peer او نظام الـHosting ان الماتش معتمد من ناحية جودة الاتصال علي شخص معين في الجيم, و اللعبة عموما ليها اسلوبها في الـHosting اللي يعتبر مختلف عن اي لعبة تانية بس عموما لعبة شغالة بالنظام دا في 2017 دا شئ غير مقبول حتي Call of Duty علي الـConsoles بطلت تعتمد علي النظام دا بنسبة كبيرة.

و ايه هي عواقب النظام ده ؟؟ ان لو حد خرج من الماتش هيتعرض انه يقف تماما عشان يتم استبداله بشخص جديد او انك ممكن تبتدي ماتش كامل مع Bots.

فا جانب الجيمبلاي الحقيقة في For Honor يعني Mixed Bag كما قال الكتاب جوانب ايجابية لو اتوفرت في اي لعبة ترفع من مستواها.

اللعبة في قلبها زي ما وضحت في الاول تصميم للشخصيات و للـCombat في اهتمام عالي جدا و مخاطرة بأنه محتاج مستوي كبير من التعليم و التجربة مع الوقت و دي حاجة مش هتخلي اللعبة بسيطة و سهلة و ممتعة من اول مرة لاي حد.

لكن في حجات كتير بتعكر التجربة.

لكن من الجوانب الايجابية للعبة بشكل عام بعيدا عن الجييبلاي تقديمها بمستوي Graphics ممكن اعتبره افضل مستوي شفته من Ubisoft في خلال الجيل الحالي.

من اول الاتجاه الفني في اللعبة اللي ناقل في الخرايط تصاميم اماكن بشكل اكتر من ممتاز, في الهندسة المعمارية للحصون من العصور الوسطي او اليابان او حتي القري الصغيرة الخاصة بالفايكنجز و لبس و دروع الشخصيات و تفاصيلها في اهتمام شديد جدا   لحد الاسلوب التقني الممتاز في مؤثرات الاضاءة العالية تقنيا والخامات و التفاصيل المبهرة في كل حاجة حواليك و مؤثرات حالة الجو المختلفة اللي بتتقدم بشكل عشوائي من ماتش للتاني. و حركة الـAnimations في وسط الـCombat او لبس الشخصيات نفسه.

اللعبة الحقيقة مبهرة بصريا و يضاف عليه ان ادائها كان ممتاز, الاداء علي الـConsoles ثابت و مستقر و علي الـPC هنا في تقديم لافضل نسخة PC من فترة طويلة في العاب Ubisoft, و اللعبة علي جهازي الشخصي علي اعلي اعدادات فيما عدا تشغيل الـSuper Sampling شغالة بين 70 و 80 FPS و ساعات كمان بتوصل لاكتر من 100 و ادائها علي الاجهزة المتوسطة برضو ممتاز و مستقر بشكل كبير بدون اي مشاكل.

و تقريبا اللعبة دي من الالعاب النادر اللي محصلش تضحية لاي مؤثرات بصرية فيها لان في بعض الاماكن في الـCampaign تحديدا كان فيها كم من الـPost Processing Effects و الـPhysics  و كم كبير من التفاصيل في المكان من حواليك يقدر انه يخلي ساعات كرت شاشة GTX 1070 ينزل تحت حاجز الـ60FPS, لكن طبعا المستويات المبالغ فيها في المؤثرات دا مش موجود كتير في الـMultiplayer.

انا شخصيا اتمني اشوف المستوي دا من الاداء و الجرافيكس في لعبة عالم مفتوح من Ubisoft خصوصا و لمعلوماتكم اللعبة دي معمولة بمحرك Anvil Next اللي اتعمل بيه Assassins Creed Unity و Syndicate.

الحاجة الوحيدة السلبية في جرافيكس اللعبة ان في بعض الشخصيات و دي ملحوظة اكتر في القصة وشوشهم مفهاش حيوية بالقدر الكافي دا لو اساسا وشهم بيبان كتير اصلا و شعر دقنهم ساعات بحس انه اقرب للبلاستيك.

بالنسبة للاصوات مكنش في حجات كتير مميزة الا اصوات المعارك اللي بتحصل في Mode زي Domnion و اصوات الاشتباكات بالاسلحة و انفعال الشخصيات بكلمات معينة بتطلع منهم مع بعض الكومبوهات كان كل دا حلو.

انما عندي تعليق علي ان الـsoundtrack وسط الـMatchmaking .. مكرر بشكل مستفز خصوصا ان ساعات في دقيقة او اتنين قبل الماتش لاستعراض الفرق و الـSoundtrack مستفز من كتر التكرار.

هو حلو وسط اللعب و خصوصا انه كله طبول بتاعت مارشات عسكرية بتخلي اجواء الترقب و المواجهات بين شخصين حلوة جدا

لعبة For Honor من الالعاب فعلا في  تصميمها جوانب تخليني احترمها شوية و قيميتها تعلي معايا شوية علي رغم من بعض من مشاكلها.

اللعبة فيها مخاطرة بتقديم اسلوب في الجيمبلاي جديد و غير مألوف و صعب و محتاج وقت لفهمه و مع فهمه بيحقق معادلة مرضية في كل مواجهة.

و زي Rainbow Six Siege وقت نزولها For Honor بتقدم برضو زي قالب لتقديم محتويات مع الوقت تطور التجربة و المحتويات دي زي Siege برضو مجانية مش محتاجة الـSeason Pass.

و لكن القالب اللي بتقدمه For Honor للاسف فيه بعض الشوايب زي الـMicrotransactions زي عدم استقرار الاتصال في اللعبة سواء من سيرفيرات اللعبة او نظام الـPeer to Peer.

و وجود وعود بان المحتوي يكبر او ان التجربة مع الوقت تتحسن بيخليني اجي و اقول اني مش بحكم علي وعود انا بحكم علي منتج.

و المنتج كما هو واضح فيه مشاكل, بس لو اللعبة دي اخدت  نفس دعم بنفس مستوي Rainbow Six Siege هتقدم مع الوقت تجربة ممتازة بالاضافة للاهتمام بعيوب الاتصال في اللعبة

لاني مصر علي ان قلب التجربة مميز و يستحق ان يكون باقي جوانب اللعبة افضل عشان يوضح و يبان


About the author

skproductions