العاب مراجعات

مراجعة Horizon Zero Dawn


ستوديو Gureilla Games مطور لعبة Horizon Zero Dawn اللي هقدملكم المراجعة بتاعتها النهاردة تاريخه من حصريات الـPlaystation عموما كان منحصر في سلسلة Killzone و دي العاب First Person Shooter بداية من جزئها التاني ركزت اكتر علي جانب الـMultiplayer منها و لكن الجزء اللي نزل في اول يوم من عمر الـPlaystation 4 و هو Shadow Fall كان اضعف و اقل اجزاء السلسلة فيما عدا تقديمه من جرافيكس, و عموما الجزء دا خلي انتظار العاب جديدة من Gureilla Games منحصر في جانب الـShooters او الالعاب الخطية بالاضافة لانتظار الالعاب دي بحذر شديد.

و لكن من 2015 ساعة الاعلان عن Horizon Zero Dawn الستوديو دخل في مجال تاني و مختلف و هو تقديم لعبة Open World و كمان RPG.

فا ممكن نقول  Gureilla Games متبعوش المثل اللي بيقول ادي العيش لخبازه و راحوا لمجال مقربوش منه قبل كده بس علي عكس اي توقعات الحقيقة هما قدموا اللي اعتبروه نقلة نوعية و كبيرة لالعابهم.

 

القصة :

قصة اللعبة اللي تابع حملة الدعاية اكيد عارف كويس الاطار العام لاحداثها عن كارثة حصلت للبشرية ادت لانقراض جزء كبير جدا منهم و من بعدها بتقريبا الاف السنين البشر رجعوا لحياة بدائية و قبلية و ميعرفوش ايه اللي حصل خلي حياتهم بالشكل دا و مش بس كده الارض متحكم فيها نوع من الروبوتس الاشبه بالديناصورات مش معروف هما مصدرهم و سبب وجودهم ايه.

في وسط كل دا بطلة اللعبة Aloy بيكون ليها اهداف شخصية ظهرت بسبب العرف الاجتماعي للقبيلة اللي هي اتولدت وسطهم و هما النورا و هدفها تعرف مين هي والدتها و مع سعيها ورا الهدف دا بتعرف اكتر و اكتر عن ايه اللي حصل للارض و اجابات علي كل الاسالة اللي ممكن تتسال عن اسرار عالم اللعبة و كل ده من خلال تسلسل احداث حلو جدا.

اللعبة اول مميزاتها من ناحية القصة التقديم الممتاز و الرائع و اللي معبي تفاصيل في كل حاجة حواليك عن الـLore و القبائل المختلفة و عاداتهم و تقاليدهم و معتقداتهم. و الخلافات السياسية و الحروب الاهلية اللي حصلت بينهم.

فوق كل دا اجابات و تفسيرات عن اللي حصل للعالم القديم, ايه سبب التدمير اللي حصل للبشر ؟ ايه مدي التقدم التكنولوجي اللي كانوا فيه ؟ ايه سبب وجود الروبوتس اللي في عالم اللعبة ؟؟

كل الاجابات علي الاسالة دي و التفاصيل معروضة بشكل ممتاز و عظيم سواء من احداث القصة او تفاصيل عالم اللعبة او الاوراق و التسجيلات اللي بتلمها من حواليك و اللي بيدعمها تعريب نصي حلو جدا لاي حد هيهتم بتعريب كل حاجة في اللعبة.

لكن شخصيا عندي تعليق علي حاجة واحدة في القصة من الممكن اقول انه كان في مجال تبقي افضل و تخليني طالع من قصة اللعبة دي مش قادر اصطاد غلطة ليها و تعليقي دا علي الشخصيات و علاقتهم ببعض.

ايلوي بطلة تطور شخصيتها كان مستواه جيد جدا و لكن هدفه الاساسي استعراض الـLore بتاع عالم اللعبة اكتر من استعراض جوانب الشخصية, لكن من ناحية ايلوي دا مكانش متسبب في نقاط ضعف كبيرة.

لكن الشخصيات الجانبية و المساعدة لايلوي اقدر اقول ان مش من السهل نلاقي في استعراض كامل لشخصيتهم و علاقتهم بأيلوي فيما عدا اول ساعتين من عمر القصة اللي كان فيهم جوانب انسانية مؤثرة جدا.

لكن بعد كده كل الحوارات كل الشخصيات عبارة عن اداه عشان نفهم و نعرف اكتر عن عالم اللعبة و التفاصيل المحيطة بيه, الموضوع دا فكرني بالجزء التاني من The Witcher اللي ركز اكتر علي العلاقات السياسة بين الممالك في اللعبة و الخيانات اللي بتحصل بينهم.

هنا نفس الكلام لقيته بيحصل و اللي اختصره في حاجة ان القصة كان ناقصها توازن بين جوانبها بشكل كبير.. انا شخصيا مش بوجه النقد دا عشان اقول ان القصة كان مستواها ضعيف لا بالعكس مستواها كان جيد جدا و رائع و فضلت مهتم بكل احداثها لحد اخر دقيقة لكن شخصيا كنت اتمني انها تقدم كجزء اول من سلسلة كبداية ليها حاجة بنفس قوة العاب RPG في بدايتها و خصوصا العاب Bioware من ناحية المساحة الكبيرة و المميزة من تقديم الشخصيات و خصوصا الشخصيات الجانبية.

الـجيم بلاي :

في جانب الجيم بلاي Horizon Zero Dawn لعبة سهل جدا ان احنا نشاور علي بعض جوانبها و نقول هي متأثرة بانهي لعبة و هنلاقي التأثر بالعاب زي Far Cry و Tomb Raider و The Witcher و العاب Bioware عموما كل التاثر دا واضح جدا , و لكن Horizon تأثرها كان لمصلحة تقديم تجربة مختلفة تماما لان محتوي اللعبة من ناحية الافكار و الـMechanics او القواعد اللي بتفرضها عليك اللعبة في تجربتها ممكن اقول انه محتوي دسم قبل ما نتكلم عن محتوي اللعبة من مهمات و نشاطات و تعالوا نبدا الكلام الاول عن الروبوتس.

اللعبة بتقدم تشكيلة من الروبوتس لكل واحد منهم هدف لوجوده في عالم اللعبة, علاقات مختلفة مع الروبوتس التانية او القطعان اللي هو متواجد فيها  و اساليب متنوعة لكل واحد سواء من ناحية الهجوم او الدفاع عن نفسه و نقاط ضعف انت بتستغلها عشان تقدر تواجهه بيها و تكافئك اللعبة اكتر علي حسن استغلالها.

في جانب الروبوتس كمان في ملحوظة في منتهي الاهمية و هي ان ذكائهم و مستوي الـAI رائع .. مفيش لحظة الروبوتس بيدوا احساس انك بتتعامل مع خيالات مأتة, علي سبيل المثال التعامل مع انواع الروبوتس المتواجدة في زي قطيع  لو انت ركزت علي واحد بس منهم ممكن تلاقيه بيهرب منك عشان يرجع مع باقي القطيع عشان يصعب عليك المواجهة اكتر و اكتر, دا مثال واحد من ضمن امثلة كتير انا شفتها لمستوي ذكائهم الممتاز.

فا هنا في زي ديناميكية و Gameplay Loop عظيمةو ممتعة و فيها ساعات تحدي عالي و ال دينماكية دي  بين الكومبات سيستم بتاع اللعبة من اختيار انواع الاسلحة المناسبة و تجهيز نفسك بشكل مناسب  و انواع الروبوتس و سلوكياتهم ممكن يخلي الشخص اللي بيلعب يفضل لساعات يصطاد و يواجه الروبوتس بدون هدف من مهمة معينة بينفذها.

الـCombat نفسه في اللعبة قايمة بشكل كبير علي استخدام انواع مختلفة من الـBow and Arrows و الانواع دي في منها استخدامات و تاثيرات و اضرار و مدي مختلف لمواقف و انواع روبوتس معينة. بالاضافة للافخاخ و اساليب متنوعة لمواجهة الروبوتس عن طريقها ليك مطلق الحرية تحدد انت عاوز تلعب ازاي.

لكن في واحد من اسلحة اللعبة و هو الـSpear انا شخصيا مستخدمتوش كتير و لكن مع المرات القليلة اللي استخدمته فيها لاحظت انه كان ناقصه بشكل كبير وجود حاجة زي Lock on تخليك تقدر تستهدف الهدف اللي قدامك بشكل مناسب و دا ادي الي ان المواجهات اللي بتستخدم الـSpear كان فيها شوية فوضي.

و في جانب تاني كان يعتبر سلبي في المواجهات و هي المواجهات مع البشر تحديدا اللي كان فيها الـAI علي عكس الروبوتس تماما متواضع و المواجهات معاهم التحدي فيها قليل شوية و كمان سهلة.المواجهات مع البشر مكنتش اساسية بشكل كبير و من حين لاخر بتواجهم بشكل جانبي مع الروبوتس و لكن تواضع ذكائهم كان بردو ملحوظ.

 

بالنسبة بقي للـRPG Elements في اللعبة, سبق و قلت ان Horizon لعبة بتميل اكتر لانها تكون لعبة Action Adventure اكتر من انها لعبة RPG .. في جوانب RPG في اللعبة و مستفاد منها بشكل كبير و مميز لكن مقدرش اقارنها بالعاب تركيزها علي انها RPG زي   Fallout 3 و New Vegas  و العاب Bioware و The Witcher 3 مؤخرا.

الموضوع بيجي اولا من Skill Tree بسيطة معمولة بشكل حلو جدا يخليك تقدر تحدد اسلوب لعبك في بداية اللعبة و علي اواخر اللعبة مش بتخليك تتحول لالة قتل مفيش حاجة تقدر توقفها لاني وضحت من شوية ان اللعبة بتفرض عليك فهم نقاط ضعف و قوة كل روبوت فممكن تكون Level 40 و روبوت Level 20 يعلمك الادب.

الـRPG Elements التانية بالنسبة للحوارات و ادارتها .. نظام الحوارات في اللعبة بيحقق ابسط حاجة ممكن تشوفها في اي لعبة RPG تانية و هو توفير ردود مختلفة انك ترد بيها علي موقف معين بالشكل اللي تحبه, لكن هل في تأثيرات مختلفة علي مسارات القصة او مصير بعض الشخصيات ؟؟ هو اه في بس مش كتير.

تركيبة المهمات بقي في اللعبة و عشان دي اكيد هيكون عليها اهتمام كبير. مهمات القصة كانت ممتازة و متصممة بشكل حلو من مواقف مختلفة للمواجهات او استكشاف اماكن معينة و انك تتعرف اكتر علي عالم اللعبة.

في بعض المهمات هي بتتقدم كمهمات اساسية لكن هي بتكون ليها طابع جانبي بعيد عن الخط الاساسي للاحداث كانت حلوة جدا في احداثها و مواقفها و اهدافها اللي فكرتني شوية بالـLoyalty Missions بتاعت Mass Effect.

بس المهمات و النشاطات الجانبية نفسها ايه نظامها ؟؟ و انا شخصيا عارف ان في ناس هتسال و هتقارن هل المهمات دي ماشية علي نمط لعبة The Witcher 3 مثلا ولا لا. فيما عدا ان عدد المهمات مش بضخامة اللي اتقدم في The Witcher 3 من ناحية العدد بس  الحمد لله  المهمات الجانبية اللي مريت عليها في اللعبة و اللي محطوطة في قايمة الـSide Missions  كلها مهمات بتقدم مواقف و شخصيات و حوارات جانبية مختلفين و منوعين و المهمات و خصوصا في تاني منطقة ممتعين جدا  و ليهم تأثير بسيط علي احداث بعض المهمات الاساسية مش هقولكم ايه طبيعة التأثير دا عشان محرقوش عليكم و اسيبكم تكتشفوه.

في مهمات تانية اسمها Earrands و دي اقرب لفكرة الـFetching Quest ان واحد يطلب منك تروح تجيب حاجة من مكان معين و ترجعله برضو كانت المهمات دي مفيهاش تكرارية و في تنوع في المواقف اللي بتقابلها منها.

في بقي النشاطات الجانبية و اللي تقريبا بنشوف من خلالها افكار شوفناها في العاب تانية اللي بتكون نوع من نشاط معين مكرر بكذا شكل علي الخريطة,  زي معسكرات بتنفضها و مناطق فيها Corrupted robots بتحاول تخلص منهم دي متقدمش منها كتير و مع كل مرة بتروح لاي واحدة منهم بتلاقي ان في طبيعة مختلفة لكل واحد و مفيش حالة استنساخ للنشاط اللي قبله.

زي علي سبيل المثال التطبيق الخاص لفكرة الابراج في اللعبة او الـtall necks

عددهم كان 5 تقريبا و لكل واحد منهم زي عنصر استكشاف و مواقف مختلفة تعملها حساب قبل ما تطلع عليه, او الـCulldorens و دي زي Dungeons في اللعبة كنت اتمني يبقوا اكتر من كده عشان كانوا ممتعين الصراحة و دول من خلالهم تقدر تاخد قدرات اكتر في السيطرة علي الـRobots

 

من جانب العالم المفتوح اللي بتقدمه اللعبة Horizon هي متعتبرش اكبر لعبة انا شفتها في الوقت الحالي و في اه العاب اكبر منها في حجم الخريطة, و لكن هي بتقدم حاجة مهمة جدا كثافة اللي موجود في عالم اللعبة و انك تستفيد منه في الجيم بلاي  و يبقي حي طول الوقت بالحياة الطبيعية .. او خلونا الميكانيكية بقي.

و غير كده محتوي العالم دا من مناطق ببيئات متنوعة و ليها طبيعتها و روبوتاتها الخاصة و المناطق دي متصلة ببعض بشكل طبيعي جدا. فا عالم اللعبة هنا ممتاز و رائع و خادم الجيم بلاي بشكل كبير و تفاصيله ممتازة في انك ممكن تروح مكان و تقدر تميز المكان دا في العالم القديم كان عبارة عن ايه او حصل فيه ايه.

 

الجرافيكس و الاصوات :

و انا عاوز من نقطة الكلام عن عالم اللعبة نطلع علي اسلوب تقديم اللعبة ككل و الجرافيكس و تقنيا اللعبة نظامها ايه .. و انا عارف ان في الدقايق اللي جاية في كلام هفوته عن اللي شفته في اللعبة لان في تفاصيل و جوانب كتير لان اللعبة دي اقل حاجة يتقال عنها تحفة فنية.

اولا انا لعبت اللعبة علي بلاي ستيشن 4 عادي مش Pro و اللعبة اداءا كانت ممتازة و نادرا لما حسيت باي Frame Drop علي مدار 50 ساعة لعب.

اللعبة المحرك اللي بتستخدمه هو Decima Engine نفس محرك Killzone Shadowfall و واضح انه اتعرض لتعديل مكثف لانه يناسب انتاج لعبة عالم مفتوح و هو مازال محتفظ بمميزات من مستوي اضاءة عظيم باين في مؤثرات زي الـLight Bloom و الـLens Flare و توزيع الاضاءة علي عالم اللعبة من خلال الـGlobal Illumnation.

و في تقنيات كتير معمولة في اللعبة عشان تقدر تقدم ابهار بصري من ناحية التفاصيل في الزرع من حواليك او حتي تفصيلة صغيرة جدا زي نمل طالع علي شجرة شايل ورق الشجر في بقه.

اHorizon ممكن اقول انها من اجمل و اروع العاب الـOpen World اللي لعبتها لحد دلوقتي ان مكنتش هي اجملهم سبق ان قلت من شوية ان في تنوع في عالم اللعبة و التنوع دي بيجي من مناطق جبلية و الغابات المحيطة بيها لغابات من نوع تاني اشبه لانها تكون استوائية لمناطق صحرواية عاملة زي الغرب الامريكي لمناطق صحراوية تانية عاملة زي صحراء الربع الخالي و كل منطقة ليها طبيعتها من ناحية الاضاءة و حالة الجو.

الـMechnical Design للروبوتس في اللعبة حاجة تانية تماما ..غير ان التصميم في حد ذاته مميز و مختلف و فيه اتجاه فني خاص بيه مع كل Robot و هتلاحظ و تشوف كل تفصيلة في الدروع و الاسلاك علي جسمه بشكل مبهر و ممتاز.

و علي سيرة الاتجاهات الفنية كان شئ رائع و ممتاز ان يكون في تميز في تفاصيل لبس و الوان و تصميم الشخصيات من كل قبيلة في اللعبة و المباني اللي بيعيشوا فيها كمان.

و Horizon عموما فيها دمج لاتجاهات فنية بعيدة عن بعض, بشكل تقني مبهر.

لكن الموضوع مش 100% مفهوش غلطة انا عندي الحقيقة كام تعليق. فيزيائية المية في اللعبة كانت بصراحة متواضعة جدا و جودة تقديم حركة وشوش الشخصيات في الحوارات متفاوتة .. حركة وشوشهم مكنتش بتتم تقريبا عن طريق الـMotion Capture انما تقريبا في استخدام لحاجة زي الـMotion keying و المفروض تقنية انا بلاحظ بشكل كبير استخدامها في العاب الـRPG اللي فيها حوارات مع شخصيات كتير و بتادي ان حركة وشوهم ساعات بتتفاوت او متكونش واقعية اوي و خصوصا مع بعض الشخصيات الجانبية.

 

الاصوات في اللعبة صوت الروبوتس كان عظيم تصميم صوت كل روبوت ان ليه مجموعة اصوات مختلفة بتفاصيل ممتازة في كل حالة سواء وهو بيموت او بيتخلع جزء منه و خصوصا مع  الانواع اللي احجامها ضخمة  في المواجهة معاهم ليهم هيبة كده.

الـSoundtrack بتاع اللعبة كان حلو جدا اللعبة ليها Main Theme مميز و مزيكا مميزة للمواجهات بتعلي الحماس بشكل حلو جدا و الاهم ان كل منطقة ليها الموسيقي اللي بتشتغل في الخلفية و انت بتتمشي خلالها بتكون مميزة و خاصة للمنطقة دي و دي حاجة كويس انهم ركزوا عليها.

اداء الشخصيات التمثيلي ليه جانبين لو انت بتلعب اللعبة باصوات انجليزي الصراحة الاداء من كل الشخصيات كان رائع و ممتاز و خصوصا Ashley Burch اللي قدمت دور Aloy انما الاصوات العربي انا بصراحة معترف ان الموضوع دا هيتوقف عليك بشكل شخصي ممكن يعجبك ممكن في بعض الناس ميعجبهاش انا مشكلتي شخصيا ان الاصوات العربي بتفتقر لان يكون فيها اداء او تمثيل. الساعتين اللي لعبتهم مجرد ناس بيقرئوا الحوارات من ورقة مش بيمثلوها دي مشكلة انا بشوفها بشكل عام في تعريب الاصوات في العاب كتير انما التعريب النصي زي ما قلت من شوية كان حلو جدا.

 

في اول الـReview انا قلت ان Horizon Zero Dawn بتمثل لـ Gureilla Games نقلة نوعية, كون ان ستوديو يطلع من تطوير سلسلة زي Killzone مستوي اجزائها بين الجيد و المتواضع للعبة بضخامة و حجم و مستوي Horizon  يثبتلي ان الستوديو دا درس بشكل مكثف هو عاوز يقدم ايه و قدمه بشكل مظبوط و دا فيه دروس لاي مطور تاني و هو علي اعتاب الدخول في مجال تطوير نوع العاب جديد.

و في خطوات كتير و ضخمة من اللعبة كبداية لسلسلة جديدة اتمني ان Gureilla Games يصبوا كامل اهتمامهم عليها و يضيفوا ليها اكتر و ينتبهوا للعيوب البسيطة قدام مميزات التجربة ككل زي الشخصيات و موازنتهم مع عرض قصة عالم اللعبة و التفاصيل اللي حواليهم او نبتدي نشوفهم بيدخلوا باللعبة دي بشكل متعمق في مجال العاب الـRPG و يحافظوا علي جوانب الاكشن اللي فيها.

اللعبة بتنضم لسجل ممتاز لحد دلوقتي من حصريات الـPlaystation 4 ضروري و بشدة للناس اللي بتحب العاب العالم المفتوح انها تلعبها و بدون اي تردد و هي بتضيف نفسها كمان وسط العاب 2017 الممتازة اللي احنا لسة في اول 3 شهور منها.

 


About the author

skproductions