العاب مراجعات

مراجعة Mass Effect Andromeda

Mass Effect™: Andromeda_20170313104053

سلسلة Mass Effect كانت من اكتر السلاسل المؤثرة في الجيل اللي فات علي الـRPG’s اللي بنشوفها من المطورين في الغرب, و هي مكنتش من اول العناوين اللي كانت تعتبر مؤثرة علي الصناعة من ستيديوهات Bioware لان اعمالهم من سنة 1998 مع العاب زي Baldur’s Gate و Neverwinter Nights ليها تأثير اكبر و اضخم علي صناعة الـRPG’s و يمكن العاب كتيرة محبوبة  في الوقت الحالي مكنش هيبقي ليها وجود الا بسبب اعمال Bioware  و اعمال ستديوهات تانية كتير بداية من النص التاني من التسعينات.

سلسلة Mass Effect تحديدا علي رغم من شعبيتها بس ليها مصادر الجدال الخاصة بيها و كان اهمهم و اكبرهم نهاية الجزء التالت اللي المفروض بيختم الثلاثية الخاصة بـCommander Shepard.

و حتي مع نزول Mass Effect Andromeda اللي بفكرة قصتها بتعزل نفسها عن الثلاثية الاصلية معزلتش نفسها برضو عن الجدال حوالين جوانب تقنية. و لكن خليني اقول ان الجوانب التقنية دي مكنتش هي السبب رقم واحد اللي يخلي  Mass Effect Andromeda لعبة عليها تعليقات كتير.

 

القصة:

القصة فكرتها مبنية علي رحلة استكشافية ضخمة بيقوم بيها البشر و مجموعة كائنات فضائية من مجرة درب التبانة عشان يستعمروا مجرة Andromeda و الرحلة بتاخد حوالي 600 سنة و بيكون فيها الاف من البشر و الكائنات الفضائية في حالة من التجميد او الـCryostassis لحد ما يوصلو Andromeda و يكتشفو ان الامور مش وردية زي ما كانوا بيتخيلوا.

لان محطة وصولهم غير مؤهلة للمعيشة و في كائنات فضائية اسمهم Kett مسيطرين علي اجزاء من المجرة و بيمثلوا خطر كبير و خصوصا مع محاولتهم للسيطرة علي حضارة فضائية قديمة و توظيفها لمصلحتهم و هي الـ Remnant.

و Scott او Sarah حسب بقي ما هتختار و هما ابطال اللعبة بيحاولوا انهم ينقذوا البعثة و يدوروا علي اماكن مؤهلة للمعيشة و يوقفوا خطر الـ Kett بمساعدة كائنات فضائية تانين من اندروميدا و هما الـAngara.

طيب في نقد قصة لعبة زي Mass Effect و استعراض سلبيتها و ايجابيتها الموضوع هيكون معقد شوية لانها لعبة قصتها و بعض جوانب الجيمبلاي متداخلين مع بعض.

فا اولا كده مستوي القصة بشكل عام ببساطة هو متوسط و قصة خيال علمي و سفر عبر الفضاء تقليدية و فيها استعراض للمعتاد من كليشيهات الصراع بين الخير و الشر بشكل متوقع و حبكة جزء كبير جدا منها مكشوف, خصوصا انها بتحاول تاني تلعب علي فكرة البطل العادي اللي بيلاقي نفسه اتحط في موقف غير متوقع و مجبر يحله بمساعدة اللي حواليه من امكانيات و اشخاص و لكن دا مع اختلاف جوانب معينة عن اول جزء و دا بيجي اولا التقديم البطئ جدا اللي مفهوش جذب انتباه بنسبة عالية و  من اسلوب الكتابة

اسلوب الكتابة و خصوصا اسلوب كتابة الحوارات كان متفاوت بشكل غريب  و خصوصا في بداية اللعبة, في حوارات كانت الحقيقة مكتوبة بشكل ضعيف و في حوارات كانت مكتوبة بشكل كويس جدا و دي تحديدا اتركزت في النص التاني من احداث اللعبة, و دا تأثيره بيقع اكتر علي جانب الشخصيات و اللي هو دا جانب يعتبر ملعب سلسلة Mass Effect طول عمرها.

الشخصيات هنا بعضهم ممكن اقول انه كمالة عدد تواجدهم معاك مش بيخليك تقدر تعرف عنه كتير و بناء عليه تقدر تكون انطباعاتك عنهم و علاقتك بيهم  زي علي سبيل المثال Liam او Cora لكن علي العكس تماما في شخصيات بتقدر تتعرف اكتر عليهم و نسبة الاهتمام بتواجدهم معاك و بشخصهم عالية جدا زي Jaal اللي يعتبر من الكائنات الفضائية الجديدة و هما الـAngara و من خلاله بنلاقي شخص شايل حمل و مسؤولية كبيرة جدا بسبب عيلته و Alian Race كامل متقسم بالحرب الاهلية و نظرتهم ناحية اي Alian Race تاني, Jaal فعلا افضل شخصية مكتوبة في اللعبة و باهتمام كبير يخليني افتكر بعض من شخصيات الثلاثية الاصلية و يليه شخصيات تانية زي Vetra.

شخصيا شايف ان اللعبة علي رغم انها قدمت مستوي  متوسط في جوانب قصتها الا انا خطت اساس كويس لحجات ممكن نشوفها في اجزاء جديدة من جوانب سياسية في اندروميدا بين اكتر من طرف و بعض الـ sub plots اللي تعتبر مثيرة للاهتمام و خصوصا للناس اللي بتحب الثلاثية و اللي من الممكن يتم الاستفادة منها في اجزاء جديدة.

الـGameplay :

و بدخولنا في الكلام عن الجيمبلاي لازم الاول اتكلم عن الجانب المشترك بين الجيمبلاي و القصة و هو ادارة الحوارات و الاختيارات و تأثيرها علي القصة بشكل عام.

نظام الـParagon و الـRenegade هنا معدش موجود النظام تم استبداله بحاجة بتحدد السمة العامة لردودك بكذا شكل و المفروض دي حاجة بتقدم منطقة رمادية للردود بتاعتك مش بتخليك عارف بشكل مباشر تأثير الرد اللي بتختاره ايه هل هو ايجابي ولا سلبي و دا شئ كويس جدا جدا.

بس مع الوقت الاسلوب دا مع تنوع رماديته بتلاحظ انه مش بيخدم او بيأثر علي بناء علاقتك مع الشخصيات اللي حواليك بشكل مؤثر و كبير ممكن يوصل للحياة او الموت او اندلاع جدال سياسي او اخلاقي مؤثر علي الاحداث, النظام معمول بشكل كبير لخدمة العلاقات الرومانسية مع الشخصات و مش بقول كده لغرض السخرية بس اللي هيركز هيلاقي ان دي الحقيقة.

ننتقل لجانب ادارة القصة من ناحية الاختيارات المؤثرة علي احداثها اه بالفعل في اختيارات بتحدد بعض التفاصيل اللي بتحصل بيها نهاية اللعبة و في الحقيقة هي مكانتش كتير او مكنتش بتقدر تخلي النهاية متنوعة في التفاصيل, بس علي الاقل مفيش حاجة بتخلك تختار لون الانفجار.

و كان في اختيارات علي رغم انها بتديلك احساس بمدي اهميتها بس لما تشوف ايه مدي تأثيرها علي المهمة بتاعتك مش هتلاقيه كبير و برضو مش بتقدم تاثير صغير علي النهاية  الا لو في نية لنقل الاختيارات دي لاجزاء جديدة.

طب نطلع بقي لجانب انا الحقيقة شايف من اقوي ايجابيات اللعبة و هو الـCombat System و الـRPG Elements المرتبطة بيه.

اندروميدا تخلت تماما عن نظام الـClasses المعتاد من السلسلة و قدمت نظام انك تبني اسلوب لعبك و الـClass بتاعك بنفسك بشوية حدود ممكن تخلينا قدام كم شبه لا نهائي من التركيبات و الافكار اللي ممكن تدمج بيها الـSkills بتاعتك و تكون كومبوهات تخليك في المواجهات قدامك سيناريوهات كتير.

انا شخصيات طول فترة اكتر من 60 ساعة لعب اتنقلت بين 5 اساليب  مختلفة بسبب النظام اللي بتقدمه اللعبة اللي يعتبر ميزته الرئيسية المرونة.

يمكن سمعتوا مني النقد دا و هو ان للاسف Andromeda اهملت او اضعفت جانب مش معتاد من السلسلة دي بس دا معتاد من العاب Bioware بالكامل و هو الاهتمام بالجانب الاستراتيجي او الاداري في المواجهات و ان يكون ليك تحكم في الـSquade اللي معاك زي انك تقدر تطلب منهم استخدام قدرات او اسلحة او انواع ذخاير معينة او تعمل معاهم الـcombos اللي ممكن تعملها بنفسك.

دي حاجة لو كانت موجود كنت ممكن اقول ان الـCombat System في اللعبة مفهوش غلطة او مش ناقصه حاجة.

بس رجوعا للايجابيات كمية الاسلحة و الترسانة الخاصة باللعبة كبيرة جدا و يمكن السبب يرجع لانواع الاسلحة الجديدة اللي تخص مجرة اندروميدا. و حاجة زي كده مع الـCombat System بتعلي الاختيارات و الـBuilds و اساليب اللعب اللي ممكن تتعمل اكتر و اكتر.

و من جانب الاسلحة الـCrafting بتقدم للسلسلة بشكل مختلف و جديد و يمكن قريب من Dragon Age Inquisition و هو الصراحة بيطلع منه نتايج كويسة جدا و هتهتم بعملية متابعة كل schematic معاك عاوز تعملها Craft.

بس دا في حالة لو انت قررت تتغلب علي كمية القوايم الزيادة عن اللزوم و تفهم تتحرك وسطها ازاي و المطلوب منك تعمل ايه عشان تقدر تنفذ خطوات الكرافتينج و اللي هي معتمدة علي انك تعمل Scan لحجات من حواليك و الاستكشاف بشكل مستمر و تلم نقاط للابحاث تستخدمها في تطويرها و نقطة الاستكشاف هنجيلها بعد شوية.

المهمات في اللعبة و بداية بالمهمات الاساسية اللي بتستمر علي مدار 20 ساعة لعب هي الاجواء بتاعتها كانت مستواها جيد و ساعات عادي. مفيش هنا تصميم لمهمات ممكن تكون مميزة بافكار مختلفة  و يكون مبني عليها جانب محوري في الاحداث سواء بالحوارات او الاكشن زي لو قارنا مثلا بـ Suicide Mission من الجزء التاني

معظم السيناروهات بتبقي دخول متتالي في Gunfights, المشكلة ان في الربع الاول من القصة كان البطئ في عرض الاحداث مساوي للبطئ في اجواء المهمات من جيمبلاي, و خصوصا بقي انك هتحس بالبطئ دا لو انت بتحاول توازن بين مهمات القصة و المهمات الجانبية.

و علي سيرة المهمات الجانبية … الموقف هنا ليه وضع خاص و غريب. و مبديا محتوي المهمات الجانبية ضخم جدا جدا بشكل يخلي اللعبة دي عشان تتقفل بنسبة 100% محتاج علي الاقل 70 ساعة لعب

اندروميدا بتقسم المهمات المفروض من حيث الاهمية .. مهمات القصة وراها مهمات شبه اساسية للفريق اللي معاك و اعضاء البعثة الاستكشافية و بتتعرف فيها اكتر علي شخصيات اللعبة و مهمات جانبية خاصة بكل كوكب بتزوره و مهمات جانبية بنظام تقليدي اللي هو Fetch quest.

و للاسف اخر تصنيفين داخلين علي بعض بدون ما تقدر تميز المهمات المهمة عن المهمات اللي معمولة لغرض الحشو.  و حشو من النوع روح هناك هاتلي حاجة تعالي هنا دورلي علي كذا بدون سيناريوهات او مواقف تكون مميزة تخلي القالب دا من المهمات مقبول.

و دا بيحصل بشكل ملحوظ في اول كوكبين و هما EOS و Havarl لكن الباقي بنلاقي الموضوع بيبقي اخف شوية و بشكل تدريجي من خلالVoled و Kadara و Eladen لان بيبقي في تصميم لبعض المهمات الجانبية ليها مواضيع  ممكن يكون مجموعة منهم بيصبو في هدف واحد يخص تعمير الكوكب بشكل عام زي التواصل مع منشقين عن الحملة الاستكشافية  و تشكيلات عصابية علي Kadara او حل صراع قبلي بيحصل بين الـKrogans علي Eladen

دي المهمات الجانبية اللي كان ليها قيمة و محتوي حلو جدا  من مواقف معبية اكشن او   من اختيارات تخليك تفكر قبل ما تحدد قرارك حتي لو كان الاختيار تاثيره علي المدي الطويل مش كبير.

و كنت اتمني لو اللعبة تقدر تحدد من اول ساعة فيها المهمات الجانبية اللي ليها قيمة بدل ما هي بترمي في وشك مهمات كتيرة تعتبر متواضعة جدا و حتي مفيش استفادة زي دعم الاستكشاف.

 

اما موضوع الاستكشاف فا هو هنا برضو جانب عليه برضو تعليقات سواء بشكل سلبي او ايجابي, و دا المفروض جانب اللعبة بتعتمد عليه بشكل كبير.

اللعبة قدمت 6 مناطق منهم 4 كبار جدا جدا في الحجم و المفروض انهم مناطق متاحين بشكل كامل للاستكشاف باستخدام الـnomad المدرعة الخاصة بعملية الاستكشاف دي. و اهم مشكلة في حتة الاستكشاف ان تقريبا مفيش حجات كتيرة من الممكن يتم استكشافها المناطق في اللعبة جزء كبير منها عبارة عن فرااااااااااااااغ شاسع و شكله جميل بس هو يعتبر فراغ في الاول و الاخر و لدرجة ان اداء اللعبة ساعات بيوصل معايا لاكتر من 120 فريم في الثانية علي اعلي اعدادات من كتر ان مفيش ادامي لا رملة او تلج.

المشكلة ان المناطق دي مفهاش حتي اشكال من الحياة البرية تخليها مميزة و تخليك حابب تشوف ايه الجديد لان الحياة البرية في اللعبة كلها 5 حيوانات تقريبا .. اه 5 حيوانات بتشوفهم في كل كوكب بتروحه

اللي بيتبقي من المناطق الضخمة دي هو استكشاف الـvaults .. نسخة اللعبة دي من الـdoungens و بصراحة انا شايف ان في فرصة ضايعة هنا من خلال الـvaults دي انك كنت تقدم محتوي فعلي قايم علي الاستكشاف بانك تخلي عددهم اكتر و بنفس تصميم اخر vault علي كوكب eladen اللي فيها تفاصيل جانبية تخليك عاوز تستكشفها و تطلع منها بحجات مميزة قبل ما تنفذ الهدف الرئيسي منها.

او حتي بعيدا عن الـvaults كان من الممكن المناطق الكبيرة دي تتملي باي مصادر لنشاطات متخليش المناطق مجرد اماكن لتجميع المعادن الخاصة بالكرافتينج فقط.

بعيدا عن جانب القصة من الجيمبلاي اللعبة بيرجع من خلالها الـCOOP mode اللي اتقدم مع الجزء التالت و هو ميعتبرش في قلب تجربته حاجة مختلفة عن اللي اتقدم في الجزء التالت من 2012 بس هو مازال الحقيقة ممتع جدا خصوصا مع الكومبات سيستم الجديد اللي موجود هنا.

اللي عجبني اكتر طريقة دمجه مع القصة نفسها و ازاي انك ممكن تستفيد منه في وسط القصة و تنفذ المهمات بدون اصلا ما تقرب من الـCOOP نفسه بانك تبعت فرق تخلص المهمات اللي قايم عليها الـCOOP Mode الكلام دا يعود عليك بالفايدة من فلوس و minerals و research points زي فكرة لما كنت بتبعت Assaassin’s ينفذوا مهمات حوالين العالم في بعض اجزاء Assassin’s Creed.

 

الجرافيكس و الاصوات :

 

تعالوا نطلع للجانب التقني من اللعبة و طبعا حركة وشوش الشخصيات حاجة اتسببت في جدال كبير و انا شخصيا اتكلمت عنها بشكل مفصل من وجهه نظري في اول فيديو في انطباعي عن اللعبة و بالمختصر دا جانب سلبي و تم اهماله في اللعبة بوجود تفاوت كبير في مستوي جودته بين الضعيف و المتواضع.

لكن علي العكس تماما مستوي جودة البيئات و تصميم الاماكن و الدروع و الاسلحة في اللعبة اقل ما يتقال عليه انه عظيم.

الاماكن علي رغم من الفراغ الشاسع اللي هي بتقدمه الا انها كانت فعلا جميلة جدا سواء من من كواكب صحراوية زي Eladen و EOS او غابات Havarl او جبال kadara.

الاهتمام بتفاصيل حالات الجو في بعض المناطق كان ممتاز .. علي طول هتلاقي اي حاجة انت لابسها بتتاثر بالعواصف الرملية او التلجية و دي تفاصيل الحقيقة كانت مبهرة جدا مع مستوي الاضاءة وتفاعلها مع طبيعة اي خامات من حواليك بمستوي Physically based rendering ممتاز,  في اللعبة في هنا استعراض مبهر للي ممكن محرك زي Frostbite يقدمه.

و الاتجاه الفني في اللعبة في حد ذاته كان رائع, تصاميم الخيال العلمي اللي بتظهر في الـ Remnant vaults في الاسلحة بكافة انواعها في المحطات و السفن الفضائية و خصوصا الـ tempest كان ممتاز و مازال فيه بعض اللي ميز الثلاثية الاصلية فنيا.

 

الاصوات في اداء الشخصيات كانت بتتفاوت بنفس اسلوب تفاوت كتابة الحوارات نفسها مرة بحس الشخصيات بيردوا علي مواقف بنبرة و اسلوب مش مناسب للموقف و ساعات الـvoice acting بيكون كويس جدا خصوصا من الشخصيات الفضائية.

انما باقي جوانب الاصوات من اسلحة صوت القدرات و خصوصا الـbiotics و صوت الـRemnants كل دي اصوات متقدمة بتصميم و طبقات من تفاصيل عظيمة ممتعة للودان.

الـsoundtrack هو كويس بس لو حد بيحب شغل Jack Wall من الجزء الاول و التاني مش هتلاقي حاجات بنفس المستوي اللي يعلم معاك زي Vigil او Suicide Mission.

في الاخر مقدرش اقول ان Mass Effect Andromeda كانت في المجمل لعبة سيئة اللعبة كان مستواها متفاوت بنسب كبيرة في جوانبها و مش هقدر انكر استمتاعي بالـcombat system و بعض المهمات الجانبية اللي بتخليني اخد فكرة عن السياسة اللي بتتبني في العالم الجديد دا او الاهتمام ببعض الشخصيات الجانبية زي Jaal و Vetra.

و قبل ما العب اللعبة قلت من الممكن اللعبة دي هتتعرض للظلم بسبب الحمل التقيل اللي واقع عليها من الثلاثية الاصلية و انها متقدرش توصل لمستواها بنسبة 100% و ممكن تقدم حاجة تكون مستواها جيد جدا بس عدم اسطوريته هيخلي الناس هتتحامل علي اللعبة.

بس الحقيقة هي ان اه للاسف اللعب عدم التزامها للاساس اللي بنته الثلاثية و اثر بشكل كبير علي العاب RPG تانية, عدم الاهتمام دا كان ليه تأثير علي انخفاض جودة بعض جوانب اللعبة زي اسلوب الكتابة و عرض الشخصيات و الـRPG elements المرتبطة بادارة القصة

و يضاف عليه مشاكل تانية ليها علاقة بالتفاوت و التذبذب في مستوي الجودة في جوانب تانية بشكل حسسني ان في فرق كتيرة جدا  ملهمش علاقة ببعض اشتغلوا علي اللعبة دي و دا ضعف اخراج راجع لـBioware Montereal.

في جوانب تخلي اللعبة مادة انها تبقي من افضل العاب السنة و في جوانب تخليني اقول ليه و ازاي عملو كده او نسيوا او اهملو جوانب معينة

في الاخر انا من جانب شخصي اتمني استمرار السلسلة تحت اخراج ستيديوهات Bioware الاساسية لان في اساس كويس اتبني من خلال اللعبة دي من عالم و شخصيات و سياسات  و دروس كتير لابد ان Bioware و خصوصا مونتريال يتعلموا منها.


About the author

skproductions