العاب مراجعات

مراجعة Titan Fall 2 من Sk Productions


في 2014 لما Titanfall اتقدمت كان خلالها تقديم لتجربة جديدة و كان اساسها اسلوب الحركة اللي معتمد علي  الباركور بالاضافة لفكرة المواجهات بالـMechs او الـTitans و علي رغم ان قلب التجربة كان مميز جدا و فيه حاجة مختلفة عن الشكل المعتاد للـShooters  بس للاسف اللعبة عانت من مشاكل مع الوقت و هي انها تفضل تجذب اعداد كبيرة من الناس لفترة طويلة من الوقت زي ما بنشوف في Shooter  تانية

بس الجزء التاني قبل نزوله ناس كتير بصتله بكذا طريقة ان من الممكن يكون محاولة تصليح اخطاء الجزء الاول و هي هي نفس اللعبة في الاخر بس احسن او انها بالفعل لعبة تستحق رقم اتنين اللي مكتوب جنبها و بتقدم جديد و بتطور من محتواها.

اي نظرة من الاتنين دول هي كانت الصح دا هنعرفه مع بعض من خلال المراجعة.

القصة:

titanfall_2_wm_d-0

طبعا الجانب الاول اللي احنا هنتكلم عنه هو القصة و الجزء الاول كانت مفتقد للجانب دا علي رغم ان كان في بعض التفاصيل اللي من خلالها بيتم تقديم عالم بتدور فيه احداث و اطراف بتتصارع مع بعض و لكن للاسف مكنش في خط احداث بوضح الكلام دا بشكل كافي.

لكن Titanfall 2 كانت العكس و في قصة هنا مركزة بشكل كبير علي جانب علاقة صداقة بين انسان و Titan

و هما Jack Cooper و Titan اسمه BT.

Jack في احداث اللعبة مجرد مجند عادي في الماليشيا اللي بتحارب جيوش شركة عسكرية خاصة اسمها IMC و ظروف بتحصل بتخليه يتحول لـpilot مسؤول عن الـTitan اللي هو BT عشان يعرفو الـIMC بيعملو ايه علي كوكب اسمه Typhoon و ايه المخطط بتاعهم ضد الماليشيا.

في جانب في القصة كان حلو جدا و في جانب كان يعني عادي و مش مبهر اوي ان الواحد يفضل وراه, الجانب الحلو هو كان عرض الصداقة اللي بتطور بين Jack و BT و خصوصا ان BT دايما بتطلع منه تعليقات بتكون فيها سخرية حتي لو هو مش قاصد.

الجانب اللي كان في وجهه نظري مكنش سئ بس كان من الممكن يبقي افضل و احسن هو الاحداث او المهمة اللي Jack و BT بيمرو بيها اللي هي كانت بنسبة 80% منها متوقع و عادي و ماشي بشكل تقليدي جدا لاي قصة شوتر فيها احباط لمخطط طرف معين للقصة عشان يدمر الطرف التاني اللي انت تبعه.  و خصوصا ان الVillians تقديمهم ميخلكش مهتم بيهم و حتي تنسي وجودهم.

الـGameplay في القصة :

maxresdefault

لكن جانب Gameplay في الـCampaign نفسه كان مفاجاة و مفاجاة سارة جدا جدا و غير متوقعة.

Titanfall 2 الجيمبلاي في  الـCampaign اتعمل باهتمام شديد عشان يبقي عكس اي Campaign لعبة شوتر تانية معتمدة علي انك تخش مكان تنفض اللي فيه بشكل ممل و تطلع علي المكان اللي بعده. و بعدت كمان عن الاعتماد المطلق علي  التصميم اللي بيتفادي مشكلة الجري و الرش  بحيث انه يعتمد علي تنوع الاعداء و الاسلحة زي Shadow Warrior  و DOOM.

اللعبة اولا فيها تقديم للشكل الاعتيادي من المواجهات و بتلاقي من خلاله ان في مساحة لتجربة اسلحة الـTitans المختلفة اللي هتقابلها في الـMultiplayer.  و معظم المواجهات اللي كانت معتمدة علي الاكشن ممتعة جدا و في تصميم مراحل اكتر من ممتاز في بعض فصول القصة.

و بعد كده  بتشوف ان بيكون في puzzles   في اللعبة و متقدمة بشكل اكتر من رائع الحقيقة و اعتمادها الاساسي علي الحركة في اللعبة و ساعات مطلوب ان يكون ليك ردود افعال سريعة عشان تنهي الـPuzzle و التحدي اللي بيقدمهولك

في وسط الـCampaign كان في بعض المواقف اللي مش هيجلي قلب احرقها ولا اعرضها قدامكم و هسيب اسيب اللي هيلعب يتفاجئ بيها و كان فيها تقديم لافكار مختلفة اقل ما تتوصف بيه انها عظيمة.

لكن لو هعلق علي حاجة الـAI ساعات خصوصا من العساكر البشر بيكون ساعات ضعيف شوية عكس بعض الـRobots اللي كانو في بعض المواقف بيجروني ادامهم, تاني حاجة  في Boss Fights في اللعبة و الحقيقة هي من ناحية التصميم كانت Boss Fights ممتازة بس مشكلتها السهولة الشديدة اللي ممكن تخليك تخلصها بسرعة.

فما عدا النقطتين دول الـCampaign كان تجربة ممتازة و غير متوقعة , اللي كان متوقع انهم يضيفو Campaign اعتيادي اللي هو اتحرك من نقطة للتانية موت اي حد ادامك و خلاص لكن هنا في اهتمام ان اللي يخلص الـCampaign ياخد تجربة مرضية حتي لو جاله احساس انه كان من الممكن يبقي عدد ساعات اللعب اطول.

الجيمبلاي في الـMultiplayer:

titanfall-2-multi3

الـMultiplayer بقي و هو الجانب اللي قدمته Titanfall بشكل اساسي في اول جزء و اعتمدت عليه برضو انه يكون المحتوي  الاهم في الجزء التاني  و اللعبة مازلت محتفظة بجزء من قلب تجربتها الاساسية اللي بتبدي من ٍShooting  اركيدي قريب من Call of Dutyبحيث ان الاسلحة الـRecoil بتاعها قليل  و اللعبة بتعتمد علي ردود الافعل و السرعة في المواجهات  بالاضافة لاسلوب في الحركة يمكن بقينا بنشوفه كتير بس Titanfall قدمته الاول في الـShooters من 2014 و هو الاعتماد علي الباركور.

اسلوب الحركة في اللعبة برضو مازال زي ماهو ممتع جدا و بقي في سلاسة اكتر و في تفصيلة جديدة اتضافت ان الاستخدام الناجح الاسلوب دا في التنقل من حيطة للتانية و دمج الـSliding او الـDouble Jump معاه ينتج عنه زيادة سرعتك بنسبة معينة في الحركة.

انما ايه الجديد اللي ممكن نشوفه من خلال اللعبة, اولا تعالو نتكلم عن الـTitans واللعبة بتقدم 6 و علي عكس الطريقة اللي الجزء الاول فرض الاختلاف بينهم و بين بعض في هنا الاهتمام بان كل Titan يبقي ليه اسلوب في اللعب و الاسلحة و القدرات تخليه مميز بشكل كبير عن الباقي.

و كمان في مستويات في صعوبة الاستخدام تخليك مع الوقت تتعلم ازاي تستخدم الـTitan دا بشكل يخليك احسن من غيرك, فا الموضوع معدش مقتصر بس علي سرعة الحركة و قوة التحمل و الموازنة بينهم زي الجزء الاول, لا في هنا Classes مختلفة بين الـTitans بتخلي في تنوع ممتاز في اللعبة و كمان اساليب لعب بتتعلمها تعرف من خلالها نقاط ضعف و قوة كل Titan

نظام الـLoadouts كمان في اللعبة اتعرض لتغييرات و اضافة حجات كتيييرة جدا ابتدت بتغيير شامل لفكرة الـTactical Ability

الموضوع ماشي بانك جنب اختيار الاسلحة وا الـPerks  بتختار Tactical Ability للـPilot اللي هتلعب بيه, و هنا بيبقي كذا اختيار منهم القدرة علي استخدام الـGrapple Hook مثلا و دي اضافة كبيرة جدا و مؤثرة  لاسلوب في الحركة في اللعبة كلها و التعامل مع الـTitans بالتحديد, و من الممكن تستبدلها باخيتارات تانية بتخلي البايلوت اللي هتلعب بيه برضو زي ما اتكلمنا عن تنوع الـTitans في اساليب لعب مختلفة برضو بينهم و بين بعض, و هنلاقي من خلالها رجوع لافكار من الجزء الاول و افكار جديدة تماما.

فا في هنا نظام لـLoadouts ممتاز و يخليك طول الوقت ادام اضافات جديدة و تركيبات مختلفة عاوز تجربها حتي الـTitans برضو هيمرو بنفس النظام اللي بيخليك تقدر تعدل علي ادائهم و قدراتهم.

بعض الناس من الممكن تسال هو اخبار الـBurn Cards اللي كانت في الجزء الاول؟؟ الكروت دي تم استبدالها بحاجة اسمها boosts و بتختار حاجة واحدة منها و بتتشحن مع الوقت او بتتشحن بشكل اسرع مع الـKills و الـScore اللي بتكسبه و بعد كده بتفعل الـBoost  و بتكون سواء كان تقوية للسلاح اللي معاك او ان تلعب لمدة معين بالـSmart Pistol بتاع الجزء الاول

هنا معدش موجود في الـLoadouts  و في  حجات تانية كتير. و دي كانت فكرة الصراحة كويسة جدا انك انت تضمن وجود مجموعة boosts او كروت بقي و يكون ليهم لازمة و مؤثرين.

فا بشكل عام من الـTitans بنظامها الجديد و الLoadouts و نظامها الممتاز اللي بتقدمه Titanfall 2 بيكون في تنوع  ممتاز في جزء كبير من محتواها عكس الجزء الاول يخلي اللي بيلعب  عنده اختيارات كتيرة يجربها.

لكن في  لمشكلة كانت موجودة في بعض الحوانب في اللعبة و هي التوازن بتاع الاسلحة و الاختيارات اللي ادامك,و اول حاجة كانت  Boost اسمها Map Hack و كما هو واضح من اسمها هي بتبين بشكل مبالغ فيه اماكن الناس في الجيم و فعلا محتاجة تتعدل و بالفعل المطورين اكدوا انهم هيعدلوها قريب, بس يعني كان واضح زي الشمس يعني انها مؤثرة بتدي افضلية كبيرة جدا للي بيستخدمها.

بعض الاسلحة برضو في اللعبة محتاجة شوية تعديلات صغيرة  الاسلحة اه هي منوعة بشكل حلو جدا في كل تصنيف و خصوصا قد ايه ان الـAnti Titans  ليها دور فعال هنا,  بس في اسلحة ليها مدي عالي جدا زي الـSMG’s اللي هي المفروض معمولة للمواجهات القريبة  انا لاحظت اني بعد فترة طويلة من اللعب اني كنت بستخدم الـSMG’s في كل المواجهات, فا اعتقد المدي بالتحديد هو المحتاج انه يتعدل في حالة الاسلحة نفسها.

الـgame modes اللي موجودة في اللعبة في رجوع من خلالها لحجات من الجزء الاول زي لكن في حجات جديدة سواء من game modes او تغييرات في القديم عموما.

افضل game mode في اللعبة و جديد تماما كان Bounty Hunter و دا افضل استفادة لفكرة وجود AI معاك في المالتي بلاير بحيث ان الجيم بيتقسم لكذا wave

الويف الواحدة فيها Grunts Specters و Mini Titans  و Bounties عبارة عن Titans زيك بيتحكم فيهم الـAI و الهدف ان الفريقين يتنافسوا علي مين يجمع فلوس اكتر من الـWaves دي و ينقلها لبنك في نهايتها و طبعا اي شخص شايل فلوس كتير بيخسر نصها لما يموت.

فا طبيعة التنافس في الـgame mode كانت ممتازة و ممتعة و مختلفة عن اي game mode تاني و استفادت بشكل الحقيقة اكتر من ممتاز من فكرة الـAI.

الـAI عموما مش موجودين في كل الـgame modes بعضهم هيكون التنافس فقط بين الناس العادية اللي بتلعب و دا خلي في توازن كويس جدا في الـgame modes اللي مش هتحتاج وجودهم.

بالنسبة للخرايط كان في هنا 9 خرايط بتصاميم كويسة بتدعم نظام الحركة بشكل ممتاز و المواجهات بين الـTitans  و بعضها او الـPilots و الـTitans.

و لكن في خريطتين انا عندي تعليق عليهم و اعتقد ان الموضوع مش جي من جانب شخصي لكن في بالفعل مشاكل صغيرة في تصميم الخرايط دي,اول خريطة هي FORWARDBASE KODAI كان التنقل باستخدام الباركور في اغلب اجزاءها مش كبير اوي زي خرايط تانية و يمكن هي كان مفضل انها تقدم مساحات كبيرة للـTitans او تفضل استخدام الـGrapple. تاني خريطة و دي فيها مشكلة مهمة و هي Complex الخريطة تعتبر في جزء كبير منها اماكن ضيقة بتخلي التنافس بين الـTitans اقرب للفوضي و مش بتبقي فيها اماكن تخلي الـPilots يقدرو يواجهو الـTitans بشكل عادل لكن باقي الخرايط اتقدمت بشكل افضل من الخريطين دول بكتير.

فا المحتوي الخاص بالـMultiplayer فيTitanfall 2 ممتاز و فيه اضافات جديدة  و تحسينات علي تجربة الجزء الاول و الاهم من كده التركيز علي ان اللعبة يكون ليها عمر اطول من Progression System من خلاله اسلحة و قدرات كتيرة سواء للـPilots او الـTitans بتضيف اللي ممكن نقول عليه Meta بتدي العمر الطويل دا للعبة.

الجرافيكس:

اللعبة من جانب الجرافيكس تحديدا سبق و قلت ايام الـBeta علي البلاي ستيشن 4 انها مختلفتش كتير عن الجزء الاول يمكن اللي اتغير شوية هو خامة الاضائة بس  و حتي و انا بلعب علي البي سي الفروقات ما بين الجزئين مش كبيرة تماما اللي تقريبا اللي Respawn اهتمو بيه اكتر الاداء و ان اللعبة تفضل شغالة علي اعلي اعدادات بفريم ريت عالي يناسب الحركة السريعة في اللعبة.

علي رغم ان مستوي الجرافيكس مش خارق خصوصا من بعد ما الواحد شاف مستوي Battlefield 1 بس الحقيقة كان في تفاصيل تستحق التقدير في الجانب الفني في اللعبة من تصميم الاسلحة و الــTitansو بعض المناظر اللي كانت جميلة الصراحة في الـCampaign.

اجابة عن السؤال اللي اتسأل في اول المراجعة و هو هل فعلا Titanfall 2 تستحق انها تكون جزء جديد ولا هي الجزء الاول بشوية تعديلات و اضافات؟

الحقيقة انا شخصيا كنت منتظر ان اللعبة مش هتكون الا تصليح اخطاء الجزء الاول و بس و مكنش هيبقي عندي مشكلة مع حاجة زي كده بس انا اتفاجئت من جوانب كتيرة في اللعبة  زي الـCampaign و الاهتمام الكبير بيه و انه كان تجربة مميزة جدا

الـMultiplayer مكنش مجرد تحسين علي جوانب الجزء الاول او تفادي للعيوب و بس لا في هنا اضافات جديدة و تغييرات من خلال نظام الـLoadouts والتنوع القايم عليه الTitans  في اللعبة  و التجربة بشكل عام كانت ادمانية و ممتعة جدا

بس في مشكلة كبيرة جدا عندنا و هي مش مشكلة في تصميم اللعبة و هو معاد نزولها

زي ما انتو شايفين الريفيو مش نازل بدري تماما و اتضح في الايام اللي فاتت ضعف مبيعات اللعبة بسبب معاد نزول اللعبة بعد لعبة عليها ضجة و اهتمام كبير زي Battlefield 1.

انا شخصيا معنديش اي فكرة ايه مدي تاثير الموضوع دا علي عدد الناس اللي بتلعب Titanfall 2 في المستقبل

بس احنا بالفعل قدام لعبة بتقدم اللي يخلي ليها عمر طويل زي اي شوتر تانية

لا و كمان ايه كل المحتويات اللي هتضاف ليها في المستقبل مجانية سواء خرايط اسلحة game modes و مفيش اي Season Pass.

فا Titanfall 2 تستحق اهتمام الصراحة اكتر من كده لانها و العاب تانية زي Battlefield 1 و Gears of War 4 و Overwatch خلو 2016 من افضل السنين اللي عدت علينا في الفترة الاخيرة من ناحية الالعاب الـMultiplayer.


About the author

skproductions