العاب مراجعات

مراجعة Watch Dogs 2


الجزء الاول من Watch Dogs  مكنش وحش علي رغم ان في جوانب كتير في اللعبة لو كان تم استغلالها بشكل افضل كانت من الممكن تبقي اللعبة مقدمة تجربة مميزة و افضل بكتير, و يمكن الجزء الاول كمان كان بيعاني برضو من التصميم المعتاد لالعاب العالم المفتوح اللي شوفناها من Ubisoft علي مدار السنين اللي فاتت اللي كان يعتبر قالب واحد بيتم اعادة استخدامه و كل دا طبعا بعيدا عن اي جدال يخص الـDowngrading او الوعود المبالغ فيها بثورية تجربة الجزء الاول.

لكن الجزء التاني من ساعة لما تم الاعلان عنه و فريق التطوير و هو بياكد ان اكتر من مرة انهم انتبهو للانتقادات و اعترفوا بيها و اشتغلوا اكتر علي انهم يحسنوا تجربة اللعبة من جوانب كتير, و اه اقدر اقول ان فعلا الجزء التاني بيقدم تقدم ملحوظ علي تجربة الجزء الاول لكن لانهي مستوي دا اللي هنعرفه مع بعض.

القصة :  

watch-dogs-2

شخصيا علي رغم من التقدم الملحوظ دا مكنتش عاوز ابتدي بكلامي عن الجانب اللي مركز فيه سلبيات اللعبة و هو القصة. مبدايا حابب اوضحلكم نقطة مهمة و هي تغيير الجو العام للقصة و الحوارات 180 درجة عن الجزء اللي فات من الجو السودوي الكئيب المبني علي الانتقام بتاع الجزء الاول للجو الخفيف اللي ساعات بيميل للكوميديا و الهزلية في الحوارات بين ابطال اللعبة.

و دا تغيير كان بالنسبالي مفيش اي اعتراض عليه طلما كان في قصة و احداث و شخصيات في ترابط كويس ما بينهم و لكن في الحتة دي بالتحديد مشاكل اللعبة بتظهر.

القصة مبنية علي ماركوس هولاوي اللي تم تلفيق تهم ليه و بعد كده بيسخر وقته لكشف النظام اللي اتسبب في توجيه التهم الملفقة دي ليه و هو نظام CTOS  اللي بيتحكم و يراقب المدن والتابع لشركة Blume و اللي لعب اول جزء هيبقي عارف الغرض منه. لكن اللعبة مبتعرضش اي حاجة تخص ماضي ماركوس و بتدخل علي طول في مجهوده هو و الفريق اللي معاه انهم يشكفوh حقيقة شركات بتاجر في خصوصية الناس  و معلوماتهم الشخصية و مسؤولة عن فساد علي مستوي سياسي بيوصل لدرجة توجيه الاصوات في الانتخابات.

مشكلة القصة انك و انت بتلعب مش فاهم هي بتعرض احداث منفصلة عن بعض بيمر بيها طقم شخصيات واحد ولا كانت بتجهز علي مدار سبع ساعات من مهمات اساسية لبداية عرض الهدف و الدافع الرئيسي لشخصيات اللعبة. فا اللي بيظهر هنا ان اسلوب كتابة الحبكة و السيناريو بتاع الاحداث مشتت و مش بيخليك عارف تتابع و تعرف هو ايه اللي بيحصل قدامك علي الاقل في النص الاولاني من احداث القصة.

علي رغم من كده الحوارات بين الشخصيات في اللعبة و عرض الصداقة اللي بينهم كانت مكتوبة بشكل كويس, القصة ميزيتها هي الشخصيات فيما عدا العدو الرئيسي اللي فضلت نص اللعبة ناسي اسمه لحد ما فضل يتكرر كتير في النص التاني. الشخصيات الاساسية اسلوب كلامهم و الـ refernces  اللي بيفضلو يقولوها علي الافلام و انهم زي ما ممكن نقول Geeks خصوصا Marcus  و Rench حتي لو كان في بعض السخافة اللي بتطلع منهم.  دا كان جانب كويس شوية لاي حد هيركز في الحوارات تحديدا و في مواقع انا مش هكدب انا ضحكت فيهم وسط الكلام بينهم و بين بعض. بس عموما القصة يعني كان لابد انها تبقي افضل من كده بكتير في الاحداث من ناحية الترابط و تسلسلها لان علي مستوي الجيمبلاي Watch Dogs 2 كان في شوية ايجابيات بتثبت ان في كذا درس فريق التطوير اتعلمه من الجزء الاول.

الـGameplay :

maxresdefault

Watch Dogs العمود الفقري المبني عليه هو الـHacking و استغلال كذا حاجة من حواليك تقدر تخترقها عشان توصل لهدفك و الجزء التاني لعب اكتر علي انه يدي مساحة اكبر للـHacking  و استغلاله اكتر من الجزء الاول. الموضوع بدا من مجموعة مهمات للقصة كان فيهم جوانب ممتعة جدا في تنفيذهم لان مهمات القصة بالتحديد مش بتفرض علي اللي بيلعب خط واحد تنفيذ المهمة بنسبة 100% بيمر من خلاله, بمعني ان التصميم هنا بقي معتمد علي فكرة الـSand Box اللي هو في مساحة صغيرة لمكان فيه المهمة المكان دا فيه مداخل و مخارج متنوعة و طرق مختلفة للوصول للهدف فا انت بتفضل تلاحظ و تشوف انت هتدخل المكان دا بانهي اسلوب و هتستغل انهي نقطة في المكان من حواليك عشان توصل للهدف و دا بتصميم مراحل مميز لكل مهمة و يعتبر تصميم حلو جدا و مش بيوجه اللي بيلعب يروح فين و يجي منين, و دا مخلي في مساحات اكبر لاساليب لعب بين الاعتماد علي الـStealth او الاكشن او استغلال ادوات جديدة زي الـDrones اللي بتتحكم فيها عن بعد او تدمج بقي بين اي اسلوب زي ما تحب.

علي مدار فترة لعبي اللي لاحظته بشكل كبير ان اللعبة بتميل لانك تستخدم اكتر الـDrones و الـStealth, اللعبة معدتش بتميل للاكشن بشكل كبير زي الجزء اللي فات بس دا مش معناه اهمال بشكل كامل ليه, لكن عشان تعتمد علي الاكشن لازم تعلي في Perks في الـSkill Tree مع الوقت تدعم الموضوع دا بشكل كبير.وبصراحة مش شايف ان دا الاسلوب الافضل للعب اللعبة و استكشاف ايه الجديد اللي بتقدمه بس وجب التنويه اكتر لان اللعبة بتحاول تخلي الـHacking و التصميم المعتمد علي الـSand Box هو قلب التجربة المرة دي.

الـAI كان بقي مسالة فيها شوية تفاوت لو انت شخص هتللعب Stealth غالبا مش هتلاقي تصرفات تخليك تعلق كتير علي مستوي ذكاء الحراس لكن لو هتخش في مواجهات بشكل معتمد علي الاكشن هتلاقي منهم الشكل المعتاد من بعض الالعاب اللي هو يقف ادامك منتظر منك تموته بدون ما يتناور معاك و رجعوا لاسلوب اللعب اللي معتمد علي الـStealth في بعض الاحيان لو تم الشك في وجودك او اتكشفت

بتلاقي انهم بيستخدمو نظام  CTOS عشان كله يعرف انت فين و يهجموا عليك و لو حصل و لقوك بتستخدم النظام دا ضدهم بيوقفوه و بيعطلو استخدامك للـHacking.

يعني في تفاوت بين ان الـAI  يكون اقل من متواضع و بين انه يكون فعلا مصدر خطر كبير يوصل لدرجة تعطيل استخدام ادواتك في الـ  Hackingنفسه.

بالنسبة بقي للـHacking بشكل عام تعالوا نبتدي باكتر حاجة من الجزء الاول شايف انها كانت ممكن تبقي افضل و هي  الـPower Grid Puzzles, كان في الجزء الاول الموضوع كان عادي و مش مبهر لكن هنا قلب الفكرة لسة موجود و لكن بشكل افضل و دا عن طريق ان البازل يتعرض في البيئة من حواليك تستغل الـDrones عشان تخلصه و ساعات بيحتاج منك دقايق تفكير تخلصه ازاي عكس الجزء الاول اللي كان الموضوع سهل شوية.

الـHacking اللي بيتم عن طريق الموبايل الخارق للطبيعة اللي مع ابطال اللعبة دا في رجوع لتقريبا كل افكار الجزء الاول و في اضافات لحجات جديدة ممكن مش كتيرة اوي في شوية تغييرات زي نصب الافخاخ مثلا او لفت انتباه الحراس ليها.

الـHacking يمكن اعتمد اكتر علي فكرة الـRemote Controlling اللي بنشوفها مع الدرونز او التحكم في كذا حاجة زي الرافعات او حتي العربيات اللي ماشية في الشارع. و عموما الـSkill Tree بتاعت اللعبة فيها اضافات كتيرة تخليك تحدد انت عاوز تلعب بانهي اسلوب و انهي Hacking Skill و من خلال الSkill Tree  و في اضافة عجبتني جدا بعض الـSkills انت متقدرش تفتحها الا لما تروح اماكن معينة في الخريطة تستكشفها بسرعة عشان توصل لحاجة تسمح بفتح الـSkills دي فا كانت اضافة ظريفة جدا انك تدمج الاستكشاف مع فتح بعض الـSkills المهمة في اللعبة.

. المهمات الجانبية كانت جزئية مهمة و خصوصا مع العاب  Ubisoft و في Watch Dogs  2 اسلوب عرض المهمات الجانبية اتغير بحيث ان كل مهمة بيكون ليها اهداف خاصة بيها او حتي قصة جانبية زي مهمات الشخصيات التاريخية في Assassin’s Creed Syndicate.

الاسلوب اللي كان معتمد علي ان نوعية مهمة تتكر لاكتر من مرة بنسبة معينة معدش موجود بس مازل في تنفيذ بعض المهمات في شوية تكرارية زي ان مهمة يتطلب منها رسم جرافيتي 15 مرة في اماكن مختلفة في الخريطة.

في مهمات بيبقي ليها قصة خاصة بيها و فيها تنوع و افكار حلوة جدا زي مهمة بكشف فيها عن فساد بعض ظباط الشرطة دي مهمة انا فيها شكيت هل هي مهمة قصة ولا مهمة جانبية و في مهمات كانت بتعتمد علي مواقف بتخلص بسرعة و مفهاش تفاصيل كتير.

بس علي رغم من تفاوت و جودة و مستوي بعض المهمات بس هنا في  خطوة عموما كويسة للتخلص من اسلوب تصميم العاب العالم المفتوح من Ubisoft خصوصا ان المهمات دي بعضها ممكن يجي عن طريق الاستكشاف.

الاستكشاف نروح منه بقي علي المدينة نفسها و هي سان فرانسيسكو و هنا يمكن المدينة بقي فيها جرعة حيوية اكتر من الجزء الاول بكتير و مواقف عشوائية بتحصل من حواليك بدون اي تدخل منك عشان فعلا المدينة تحسسك بالاندماج فيها حتي جزئية الاستكشاف في المدينة بقت برضو اعلي من اول جزء و في اماكن  كتير ممكن تحب استكشافها.

لكن السواقة وسط المدينة كانت  حاجة فيها شوية مشاكل الجزء الاول كان مشكلة السواقة الاسلوب الاركيدي اللي عاوز يعمل نفسه واقعي فا قدم تحكم لزج, هنا للاسف الموضوع مكنش فيه حاجة وسط السواقة هنا بقي اركيدي بشكل زايد عن اللزوم يحسسك في بعض الاحيان انك مش ماشي علي اسفلت لا انت ماشي علي سراميك مرمي عليه صابون. هي اه اللعبة لعبت علي انها تقلل و تعلي الاحساس دا مع بعض العربيات عشان تحاول تميز الانواع المختلفة عن بعض بس كان بصراحة احساس السواقة مش ممتع شوية خصوصا في اول كام ساعة لعب لحد ما الواحد قدر يتعود علي الاسلوب اللي مليان زحاليق دا.

المشكلة ان الموضوع دا بيبان تاثيرة في المطاردات مع ان الـAI في المطاردات و خصوصا مع الشرطة ممتاز الحقيقة و العنف بتاعهم في المطاردات دي بيخليك تحاول تتفاداهم باي شكل. يمكن من جانب السواقة اللي كانت متحسن بشكل كبير الHacking

الاونلاين في اللعبة كان في كذا جانب, في المهمات اللي ممكن تخلص Coop و دي كانت ممتعة و صعبة و حلوة جدا و كانت اتمني انها تبقي اكتر من كده و من خلالها دمج الشكل الجديد لتنفيذ المهمات مع استخدام الـDrones انت و صاحبك و انتو بتلعبوا مع بعض كان فعلا ممتع جدا جدا,انا عارف ان اه تصميم المهمات معمول بشكل كبير ان شخصين يلعبو مع بعض بس يا سلام لو كان في مساحة لاربع اشخاص يلعبو مع بعض

الجانب التنافسي لسة موجود في انك تعمل invading لشخص تاني تسرق منه فلوس او تموتوا بعض او Game Mode اسمه Bounty Hunter حاليا بيعاني في الـMatch Making  الطويل جدا عشان تلاقي شخص بيتسبب في فوضي كبيرة في الجيم بتاعه و تخش تقتله.

الـGraphics و الاصوات :

770761469676049839

Watch Dogs  2 من ناحية الـGraphics علي البلاي ستيشن 4 كانت في اماكن كتيرة جدا بتدي مناظر جميلة جدا و يمكن اللي مخلي المناظر دا حلوة بشكل دا التنوع في درجات الالوان في الاماكن من حواليك, و سان فارنسيسكو بتصميمها القريب بشكل كبير جدا من المدينة في الحقيقة كان فيها تنوع في تصميم المناطق اللي بتروحها من اول منطقة السيليكون فالي تجمع الشركات التقنية المهمة لحد الاحياء اللي بتتجمع فيها العصابات اللعبة شكلا فعلا تخليك تحب تتمشي فيها,

و تصميم شخصيات اللعبة و خصوصا في الـcutscenes كان حلو جدا و من جانب الـAnimations اللعبة في اهتمام كبير بتفاصيل كتير خصوصا بعض الحركات اللي بيعملها ماركوس في التنقل و الحركة اللي معتمدة علي الـParkour

لكن Graphics اللعبة دي فيها حاجة غريبة جدا و انا لاحظتها و نلخصها في التفاوت, في بعض الاحيان كان بيحصل تفاوت في جودة اللي قدام عينك من مكان للتاني و مع الوقت اعتقد السبب فيه اسلوب توزيع الاضائة في عالم اللعبة. في اماكن لما بتكون فيها ضلة او بتكون الاضائة فيها قليلة ساعات بحس ان اللعبة قربت من مستوي الجزء الاول

بس بشكل العام اللعبة شكلها حلو في اماكن كتيرة جدا بس هي متعتبرش قدمت مستوي عالي و مختلف و جديد في العاب تانية من Ubisoftمستواها اعلي يعني Assassin’s Creed Unity من 2014 مستواها افضل ان مكنتش هي اكتر لعبة مبهرة بصريا قدمتها Ubisoft في الجيل الحالي علي رغم من ماسوية ادائها اول ما نزل.

الاصوات في اللعبة الساوند تراك كان غريب, غريب بشكل حلو و كان كله شغل الكترونيك و مناسب لاجواء معينة بتعلي فيها حالة التنشنة اللي انت فيها في اي مهمة

و الـVoice Acting  في اللعبة ممتاز مستواه مقلش باي شكل من الاشكال طول اللعبة و تصميم الاصوات من حواليك في سان فرانسيسكو كان حلو جدا من خلال بقي حوارات بتحصل بين الناس في الشوارع عصابات بتتخانق مع بعض محلات بتكون مشغلة مزيكا بتسمعها من بعيد الجوانب دي فعلا قدرت تقديم الحيوية في سان فرانسيسكو بشكل كويس جدا.

يمكن صوت العربيات كان محتاج شوية يبقي احسن من اللي موجود في اللعبة لان في عربيات عادية صوتها مكتوم اه في عربيات شغالة بالكهربا طبيعي صوتها يكون مكتوب بس الاصوات الطالعة من العربيات العادية كان ممكن يبقي احسن .

الرأيي النهائي :

Watch Dogs 2 تعتبر خطوة لقدام و خطوة كبيرة من ناحية تصميم الجيمبلاي عن  اللي اتقدم في الجزء الاول و اللعبة اتعلمت بنسبة كبيرة من غلطاتها. و التصميم دا زي ما قلتلكم قبل كده يمكن نظرة بسيطة علي الاسلوب اللي ممكن تجدد و تغير بيه Ubisoft تصميم العاب العالم المفتوح و انهم يبتدو يبعدو عن الفورميلا المعتادة منهم.

لكن اللعبة كان في بعض الجوانب اللي محتاجة اهتمام اكبر  زي طريقة سواقة العربيات التركيز علي ان الAI في كل المواجهات يقدم مستوي ثابت و يكون كويس  و يا ريت يكون في استمرار اكتر في تحسين المهمات الجانبية في باقي العابهم.

لكن الاهم من كل دا يا ريت Ubisoft يرجعو يهتمو بالقصة لان لتالت مرة السنة دي القصة منهم تطلع بشكل فيه جوانب ضعف كبيرة و احنا مستنين منهم رجوع  لعبة زي  مش هينفع معاها عرض القصة بشكل ضعيف نهائي

لكن في كل الاحوال التجربة اللي قدمتها Watch Dogs 2 كانت تجربة ممتعة و تستحق التجربة و فيها افكار حلوة كتيرة بتقدمها

و قدمت محاولات ناجحة لانها تعوض عدم استغلال بعض الافكار اللي كانت موجودة في الجزء الاول بشكل صح.


About the author

skproductions