انمي مراجعات

AKIRA – ANIME MOVIE REVIEW!


تقريبا بنسبة كبيرة محدش بيتفرج على افلام انمى و حاجة من الافلام ديه بتعدى و محدش بيشوفها زى انا مثلا كده قعدت فترة كبيرة جدا لحد اما شفته

الفيلم ده كان فى سنة 1988
خلينى ابدأ بان انا لسه شايفه من فترة كده و ال animation عالى فتخيل ده ساعتها كان عامل ايه ده غير ان ميزانية الفيلم كانت الاعلى ساعتها فى صناعة الانمى كانت حوالى 11 مليون دولار

الفيلم قصته عن ان بعد الحرب العالمية التالتة اليابان بقت خربانة و طوكيو بقت فى الضياع بعدها ب تلاتين سنة بقى فى مدينة اسمها نيو طوكيو .. المسئول عن خراب طوكيو كان عبارة عن “انفجار كبير” من شخص اسمه اكيرا
فبالتالى الجيش شاف انه لو قدر يستغل قوته و يجيب ناس و يقدر يتحكم بيهم فاكيد هيقدر يحافظ على البلد و السلام و الاطمئنان و الحنان و يعمل يوتوبيا
المهم ان فى حد هيحصله حادثة و الفيلم هيبدأ

الفيلم فكرته معقدة فى وقتها و لحد دلوقتى برده الفيلم بيجمع ما بين فلسفة بعض الناس فى استخدام القوة اللى هم الجيش فى عالم خيالى مستقبل مدمر
فاكيد هتبقى حاجة جامدة انهم يستغلوها

مش عايز اتكلم اكتر عن القصة عشان مليانة بس عموما الفيلم مش بس مقتصر على كده بالعكس الشخصيات الرئيسية هما شوية صحاب عاملين عصابة موتسيكلات اسمهم Capsules

الموسيقى هنا غريبة بسبب انهم كانوا عايزين يخلوها مناسبة للعالم اللى صنعوه و كانت لايقة بدرجة غريبة لانك لو سمعتها لوحدها مش هتعجبك اوى بس فى سياق اللى انت بتشوفه كانت مناسبة الملحن للفيلم اسمه Katsuji Misawa بس مشتغلش فى حاجة بعد كده و لا قبل كده

الشخصيات هنا ممكن نظهر شوية عيوب فى الفيلم

شخصيات الفيلم كتيرة صعب انك تتحكم فيهم كلهم فى فيلم مدته ساعتين بس و ده مفهوم طبعا

الحاجة اللى بالنسبالى شايفها مش قد كده هو ان اسم الفيلم اكيرا و ده اسم شخصية و اتقال اسمه كتير فى الفيلم بس المدة اللى ظهر فيها متكملش 5 دقايق
و ديه حاجة كبيرة اما تسمى الفيلم اكيرا و يظهر بتاع خمس دقايق بس
يمكن يكون من الاحسن انه مكانش ظهر

فيه ثلاثة اشخاص موجودين لهم قوى خارقة و كده ملهمش اى تاريخ مفيش حاجة تربطك بيهم مع ان الفيلم داير عليهم مفيش غير مشهد واحد جابوا Flashback بس

الشخصيات الرئيسية كانت ممتازة اذا كان اللى من الجيش او العصابة اللى الفيلم فعلا متمركز عليهم علاقتهم كانت حلوة البطل نفسه كان السيناريو بتاعه مظبوط ما بين الدراما و الكوميديا الابطال هم:

kaneda اللى بيأدى الصوت هو Mitsuo Iwata اعماله كانت فى D gray man و Paprika

Tetsuo اللي بيأدى الصوت هو Nozomu Sasaki اعماله كانت فى Yu Yu Hakusho: Ghost Files

Kei اللى بيأدى الصوت هى Mami Koyama اعمالها كتيرة الصراحة اجددهم فى sailor moon و كانت فى Dragon ball

المدينة اللى انت بتشوفها فى الفيلم تحفة بتحس انها حية و ان احتمال انها تبقى موجودة فعلا

حاجة ال third act “الجزء القريب للنهاية” انا حاسس انهم اتسرعوا فيه بسبب حاجات حصلت كانت ممكن تكون احسن من كده و مشاهد خليتنى اقول اشمعنى

خلينا نتكلم على حاجة كده الفيلم كان فى سنة 1988 و المانجا خلصت فى 1990 فده خلى بعض الناس تحقد و تقول ايه القرف ده ده مش ماشى مع المانجا

الفيلم ده يعتبر علامة فى افلام ال animation بيتعامل مع اللى بيتفرج على انه كبير و بيفهم مش متخلف و مبيفكرش و ان ده فيلم خد الفكرة و بنى عليها نهايته

لحد دلوقتى النقاد و ناس كتيرة معتبرينه من احسن اذا مكانش احسن فيلم animation اتعمل! و شركة Warner bros بتدور على مخرج يعمل نسخة live action منه كان فى اشاعة انه كان هيبقى نولان و كان لسه فى كلام ان جورج ميلر قال لأ عشان عايز يهدى اللعب بعد Mad Max Fury Road

حاجة اخيرة ال animation ثم ال animation ثم ال animation ياخوانا

فخلينى اقول ان التقييم هو : لازم تشوف الفيلم ده قبل اما تموت


Akira - making history
  • Direction - 8.0/10
    8.0/10
  • Animation - 10/10
    10/10
  • Characters - 7.5/10
    7.5/10
  • Music - 8.0/10
    8.0/10
  • Story - 8.0/10
    8.0/10
8.7/10

About the author

Mohamed Asaad

Loves Movies, Series, Anime, Manga, Comics and can talk for hours about them, metal music is what drives me and I'm a Big Geek!